Júkti shamadan artyq tıegen aýyr kólikterdi baqylaý kúsheıtildi – mınıstrlik
ASTANA. KAZINFORM – QR Kólik mınıstrligi Avtomobıl kóligi jáne kóliktik baqylaý komıtetiniń tóraǵasy Altaı Áli shamadan artyq júk tıegen aýyr kólikterdi joldarda tirkeý júıesine qatysty túsinik berdi.
«Bıyl elimizde avtomobıl joldaryn jóndeý jáne salý boıynsha jumystardyń rekordtyq sany júrip jatyr, bul shamamen 12 myń shaqyrym. Jol qurylysymen qatar, onyń saqtalýyn qamtamasyz etý mindeti tur. Joldardyń buzylýyna yqpal etetin negizgi faktorlardyń biri – ruqsat etilgen salmaqtan asyra tıep, aýyr júk avtokólikterin jolǵa shyǵarý. 95 myń km joldaǵy kóliktik baqylaý 47 jyljymaly beket kúshimen júzege asyrylady, ıaǵnı 1 beketke 2 myń km-ǵa deıin keledi. Sondyqtan barlyq joldy baqylaýmen, tek jyljymaly beketterdiń kúshimen tolyq qamtý is júzinde múmkin emes. Osyǵan baılanysty kóliktik baqylaý salasynda tsıfrlandyrý engizilip jatyr, onda tekserý protsesinde adamı faktor alynyp tastalady», - dedi Altaı Áli Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, tıisti zań aıasynda respýblıkalyq mańyzy bar avtojoldarda avtomattandyrylǵan ólsheý stantsııalaryn (AÓS) ornatý quzyreti «QazAvtoJol» UQ» AQ-ǵa, al jergilikti avtojoldarda jergilikti atqarýshy orgadarǵa jatqyzylǵan. Bul turǵyda jergilikti atqarýshy organdar 150 AÓS ornatýǵa daıyn.
«QazAvtoJol» UQ» AQ respýblıkalyq joldarda shamamen 70 AÓS ornatýdy josparlap otyr.
«Atap aıtqanda, «Sergek» qaǵıdaty boıynsha aıyppuldy adamnyń qatysýynsyz resimdeý úshin Kólik mınıstrligi men Bas prokýratýranyń Quqyqtyq statıstıka jáne arnaıy esepke alý komıtetiniń aqparattyq júıelerin ıntegratsııalaý boıynsha jumystar atqarylyp jatyr. Byltyr Astana qalasy ákimdiginiń qoldaýymen qalaǵa avtokólik kiretin negizgi 7 orynda AÓS ornatý boıynsha jumys bastaldy. AÓS joq jerlerde júk kólikteriniń júrýine tyıym salatyn belgiler ornatylady jáne bul joldar «Sergek» kameralary arqyly baqylanady», - dedi komıtet basshysy.
Onyń sózine qaraǵanda, bıylǵy 1 qyrkúıekten bastap Astanada júk avtokólikterin baqylaýdy AÓS júıesi qamtamasyz ete bastady. Bul rette, 100 km radıýsta ornalasqan 29 karerden qalaǵa ınertti materıaldardy tasymaldaıtyn 6305 júk kóligi qamtylyp otyr.
«Qazir elimizdiń joldarynda 5 mln-ǵa jýyq avtokólik júr, onyń ishinde 55 myńǵa jýyq júk kóligi joldyń buzylýyna áser etip jatyr. Memleket jyl saıyn avtojoldardy salý men jóndeýge mıllıardtaǵan qarajat bólip keledi. Sondyqtan bizdiń mindetimiz – jol ınfraqurylymynyń saqtalýyn barynsha qamtamasyz. Sonymen birge salmaq parametrlerin buzǵany úshin jaýapkershilik júk jóneltýshige de júkteledi. Bul turǵyda júkti artyq tıemeý úshin karerlermen, sondaı-aq beton zaýyttarymen tıisti jumysty atqaryp jatyrmyz. Bul talaptardy buzǵany úshin júk jóneltýshilerge 30-100 AEK mólsherinde ákimshilik aıyppul qarastyrylǵan. Qazirgi kezde Astana qalasynda 53 beton zaýyty men 1137 mıkser (beton tasymaldaıtyn kólik) bar», - dedi Altaı Áli.
