Júkti áıeldiń óliminen keıin ne ózgerdi: SQO Densaýlyq saqtaý basqarmasy jaýap berdi
PETROPAVL. KAZINFORM - Soltústik Qazaqstan oblysynda 34 jastaǵy júkti áıeldiń qaıtys bolýyna baılanysty qurylǵan arnaıy komıssııanyń jumysy áli aıaqtalǵan joq.
Bul týraly oblystyq densaýlyq saqtaý basqarmasy Kazinform tilshisiniń saýalyna bergen jaýabynda habarlady.
Vedomstvo málimetinshe, ana óliminiń sebepterin anyqtaý úshin arnaıy komıssııa qurylǵan. Onyń quramyna basqarma basshysynyń emdeý isi, ana men bala densaýlyǵy jónindegi orynbasary, oblystyq kópbeıindi aýrýhana janyndaǵy Perınataldyq ortalyqtyń dırektory ári shtattan tys bas akýsher-gınekolog, sondaı-aq terapevt, hırýrg, anestezıolog, ýltradybystyq dıagnostıka dárigeri, sarapshy dáriger jáne zańger engizilgen. Komıssııa jumysy sot-medıtsınalyq saraptama qorytyndysy shyqqannan keıin aıaqtalady.
Sonymen qatar, SQO boıynsha Medıtsınalyq jáne farmatsevtıkalyq baqylaý komıteti departamenti medıtsınalyq kómektiń sapasyna qatysty tekserýdi bastaǵan.
Oqıǵa bolǵan Jambyl aýdandyq aýrýhanasynyń málimetinshe, 2026 jyldyń alǵashqy alty aıynda joldardyń jaı-kúıine baılanysty naýqastardy tasymaldaý ýaqyty uzarǵan úsh jaǵdaı tirkelgen. Soǵan qaramastan, barlyq patsıentter aýdandyq aýrýhanaǵa ýaqytynda jetkizilip, qajetti medıtsınalyq kómek alǵan.
- Osy oqıǵadan keıin oblystyq densaýlyq saqtaý basqarmasy birqatar aldyn alý sharalaryn qolǵa aldy. Atap aıtqanda, oblystyq kópbeıindi aýrýhana janyndaǵy Perınataldyq ortalyqta shalǵaı aýyldarda turatyn júkti áıelderge arnalǵan «Salaýatty ana» pansıonaty jumys isteıdi. Munda bosanýǵa jaqyndaǵan áıelder ýaqytsha ornalasa alady.
Sondaı-aq, basqarma oblys ákimdigine Jambyl aýdanyndaǵy Blagoveşenka- Presnovka avtojolynyń jaǵdaıyn jaqsartý qajettigi týraly resmı hat joldady, - deıdi basqarma basshysynyń orynbasary Nurılıa Qasenova.
Densaýlyq saqtaý basqarmasynyń deregine sáıkes, byltyr óńirde ana óliminiń bir jaǵdaıy tirkelgen. Bıyl da bir ana ólimi tirkelip otyr.
Sondaı-aq vedomstvo oblystaǵy náreste ólimine qatysty málimetti de berdi. 2025 jyly SQO-da 4 684 sábı dúnıege keldi. Náreste ólimi kórsetkishi 1 000 tiri týǵan balaǵa shaqqanda 6,32 promılle bolǵan. Bul shamamen 30 sábıdiń bir jasqa tolmaı shetinegenin bildiredi. Al 2026 jyldyń alǵashqy bes aıynda kórsetkish 6,85 promıllege deıin ósken. Densaýlyq saqtaý basqarmasy náresteler óliminiń negizgi sebebi perınataldyq kezeńde týyndaıtyn asqynýlar ekenin atap ótti.
Buǵan deıin SQO Jambyl aýdanynda 34 jastaǵy júkti áıeldiń jolda qaıtys bolǵandyǵy týraly jazǵan edik.
