Júkti áıelder skrınıngten nege qalmaýy kerek
ASTANA.KAZINFORM — Densaýlyq saqtaý mınıstrligi prenataldyq skrınıngtiń mańyzyn eske salady.
Prenataldyq skrınıng bolashaq ananyń densaýlyq jaǵdaıyn jáne uryqtyń damýyn ýaqtyly baǵalaýǵa múmkindik beredi.
Júktilik kezeńinde áıel birneshe medıtsınalyq baqylaý kezeńinen ótedi. Solardyń biri — prenataldyq skrınıng. Bul ýltradybystyq zertteýdi (ÝDZ), qan taldaýlaryn jáne beıindi mamandardyń konsýltatsııalaryn qamtıtyn keshendi tekserý.
Zertteýler júktiliktiń belgili bir merzimderinde júrgiziledi. Olardyń maqsaty — áıeldiń densaýlyq jaǵdaıyn jáne uryqtyń damýyn baǵalaý, yqtımal qaýip faktorlaryn anyqtaý jáne qajet bolǵan jaǵdaıda qosymsha dıagnostıkanyń qajettiligin aıqyndaý.
— Skrınıngtiń árbir kezeńi belgili bir merzimde júrgiziledi jáne ózindik mańyzy bar. Sondyqtan taǵaıyndalǵan tekserýlerden qalmaı, dárigerdiń usynymdaryn saqtaý mańyzdy. Eger skrınıng nátıjeleri boıynsha qandaı da bir suraqtar týyndasa, áıelge qosymsha tekserý taǵaıyndalýy múmkin. Qosymsha tekserýge joldama berý baladan qandaı da bir aýrý anyqtaldy degendi bildirmeıdi, — deıdi Almaty qalasyndaǵy № 36 qalalyq emhananyń dárigeri Ábýbákir Aqbota Ómirbekqyzy.
Mamandar bolashaq analarǵa júktilik boıynsha ýaqtyly esepke turýdy, medıtsınalyq baqylaý kestesin saqtaýdy jáne taǵaıyndalǵan zertteýlerden belgilengen merzimde ótýdi usynady.
Aıta keteıik, prenataldyq skrınıng MÁMS sheńberinde tegin júrgiziledi. Júktilik kezinde turaqty medıtsınalyq baqylaýdan ótý qajetti medıtsınalyq kómekti ýaqtyly alýǵa jáne bolashaq anaǵa júktiliktiń barlyq kezeńinde keshendi medıtsınalyq súıemeldeýdi qamtamasyz etýge múmkindik beredi.
Buǵan deıin júktilikke baılanysty áleýmettik tólemdi rásimdeýde qandaı qatelikter jıi kezdesetenin jazǵanbyz.
