Juqpaly aýrýlarmen kúreste vaktsınadan artyq eshteńe shyǵarylǵan joq - dáriger
NUR-SULTAN. QazAqparat – Juqpaly aýrýlarmen kúresý úshin vaktsınadan artyq eshteńe oılap tabylǵan joq.
Bul týraly medıtsına ǵylymdarynyń doktory, ımmýnolog, professor, QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti dárilik zattar men medıtsına buıymdaryn saraptaý ortalyǵynyń sarapshysy Pavel Derıabın aıtty, dep habarlaıdy QazAqparat tilshisi.
«Koronavırýsqa qarsy vaktsına týraly aıtqanda, adamzattyń juqpaly aýrýlarmen kúresý úshin ımmýnoprofılaktıka men vaktsınatsııadan artyq eshteńe oılap tappaǵanyn eske alǵan jón. Bul – adamzattyń eń úlken jetistigi. Osynyń arqasynda qazir biz aýrýdyń múldem basqa qurylymyna ıe boldyq. Birinshisi – bizde tabıǵı sheshek múldem joıyldy. Ol týraly kóp aıtyldy, taǵy da aıta berýge bolady. Bul mıllıondaǵan jáne ondaǵan mıllıon adamnyń ómirin qıǵan aýrý. Búgingi tańda bizde aýrýlar qurylymynda dıfterııa, qyzylsha, kókjótel joq. Biz bul aýrýlardyń klınıkalyq kórinisin umyta bastadyq. Munyń bári osy aýrýlarǵa qarsy josparly vaktsınatsııanyń bolýyna baılanysty», - dedi P. Derıabın onlaın dáriste.
Professor Qazaqstandaǵy vaktsınatsııaǵa qarsy qozǵalystyń uzaq ýaqyttan beri paıda bolǵanyn jáne koronavırýsqa qarsy vaktsınatsııaǵa baılanysty emestigin atap ótti. Vaktsınatsııanyń arqasynda qaýipti juqpaly aýrýlardyń epıdemııasy toqtaǵandyqtan jáne ınfektsııalar bolmaǵandyqtan, keı adamdar vaktsınatsııa qajet emes dep sanaıdy.
«Ótken ǵasyrdyń 90-shy jyldarynyń tájirıbesi kórsetkendeı, halyqty vaktsınatsııalaýǵa nazardyń álsireýi, materıaldyq bazanyń álsireýi árdaıym dıfterııa, qyzylsha jáne t. b. sııaqty ınfektsııalarmen syrqattanýdyń «órshýine» ákeledi. Sondyqtan BUU vaktsınatsııadan bas tartýdy Jer turǵyndarynyń densaýlyǵy úshin eń qaýipti 10 faktorǵa engizdi. Qazaqstandaǵy ınfektsııalyq aýrýlardan qorǵaý tetigi, ınfektsııalyq aýrýlardyń aldyn alý salasynda jınaqtalǵan bilim koronavırýspen kúresýge jáne qalypty ómirge oralýǵa kómektesedi», - deıdi dáriger.
