Júkembaev pen Sabyrov Kanadadaǵy jekpe-jekteri aldynda salmaq ólshedi
Aıqas aldynda qazaqstandyq qos boksshy men olardyń qarsylastary mindetti salmaq ólsheý rásiminen ótti.
«Qazaqstannyń kásipqoı boksy» akkaýntyndaǵy málimetke sáıkes, Júkembaevtiń salmaǵy - 141,2 fýnt, onyń opponenti, meksıkalyq boksshy Hılberto Mesaniki (10-5-1, 6KO) 141,5 fýnt boldy. Birinshi orta salmaqtyń lımıti - 140 fýnt. Degenmen, azdaǵan aýytqýǵa jol beriledi.
Al Sabyrov argentınalyq Sesar Ernan Reınospen (15-11-4, 7KO) jekpe-jek aldynda 172,2 fýnt salmaq tartty. Reınos tarazyda 170,2 fýnt kórsetti. Sýperorta salmaqtaǵy lımıt - 168 fýnt. Tıtýldyq emes osyndaı aıqastarda salmaqtyń asyp ketýine ruqsat beriledi.
Buǵan deıin habarlaǵanymyzdaı, Júkembaev pen Sabyrovtyń jekpe-jekterin tikeleı efırden «Habar» telearnasy kórsetedi. Translıatsııa jeksenbi kúni, Astana ýaqytymen tańǵy saǵat 07.10-da bastalady.
Sabyrov - Reınoso aıqasy segiz raýndqa eseptelgen. 25 jastaǵy Nurzat «Eye of the Tiger Managament» kanadalyq promoýterlik kompanııasynyń qamqorlyǵynda. Ol 2018 jyldyń 24 qarashasynda ótken sońǵy kezdesýinde meksıkalyq boksshy Rokkı Montoıany (32-3, 22 KO) ekinshi raýndta nokaýtqa jibergen bolatyn.
Al Batyr Júkembaev áý-basta meksıkalyq boksshy Karlos Hımenespen (14-9-1, 8KO) judyryqtasýy tıis bolatyn. Alaıda, Hımenestiń vıza máselesinde qıyndyqtar týyndap, oǵan Kanadaǵa sapar shegýge ruqsat berilmegen. Endi qazaqstandyq boksshy Meksıkanyń ózge ókili Hılberto Mesamen shyǵady. Batyr sońǵy kezdesýin byltyrǵy jyldyń 6 qazany kúni Kvebekte ótkizgen edi. Ol meksıkalyq sportshy Patrısıo Lopes Morenony (21-3, 15KO) jetinshi raýndta nokaýtqa túsirdi.
⠀