Júkembaev-Lara jekpe-jegin qaıdan kórýge bolady
Batyr Júkembaev (17-0, 13 KO) basty aıqasta shyǵatyn Kanadadaǵy boks keshine barlyq bıletter satylyp ketkenin buǵan deıin habarlaǵan edik. Sondaı-aq boksshynyń IBF Latino chempıony argentınalyq Maksımılıano Rıkardo Veronǵa (12-3-1, 4 KO) qarsy aıqasatyny jarııalanǵan bolatyn. Alaıda, kanadalyq BAQ-tyń habarlaýynsha, otandasymyz «Rıkı» laqap atty meksıkalyq Rıkardo Laramen (22-7, 10KO) kezdesedi.
25 qańtarda ótetin aıqasta qazaqstandyqqa tıesili birinshi orta salmaqtaǵy WBA Continental Americas pen IBF Inter-Continental tıtýldary sarapqa salynady.
«Qazaqstandyq boks súıer qaýym Júkembaev-Lara aıqasyn «Habar» arnasynan tikeleı efırden kóre alady. Jekpe-jek jeksenbi kúni (26 qańtar) saǵat 08.30-da bastalady», - dep habarlady «Qazaqstan kásipqoı boksy» federatsııasynan.
Esterińizge sala keteıik, Batyr Júkembaev byltyr 26 qyrkúıek kúni Monrealda meksıkalyq Mıgel Vaskeske qarsy (41-9, 15 KO) ótkizgen sońǵy judyryqtasýynda tóreshilerdiń biraýyzdy sheshimimen jeńiske jetken bolatyn. Halyqaralyq boks uıymynyń (IBO) reıtınginde ol óz salmaǵynda 11-shi orynda tur.