Júk vagonyndaǵy órt: Mańǵystaýda 2 naýqastyń jaǵdaıy aýyr

AQTAÝ. QazAqparat – Mańǵystaýda júk vagonynda gaz ballony jarylysynan zardap shekkenderdiń jaǵdaıy belgili boldy, dep habarlaıdy QazAqparat tilshisi.

5 naýqas qazir Beıneý aýdandyq ortalyq aýrýhanasyna jetkizilgen. Aýdandyq ortalyq aýrýhana bas dárigeriniń mindetin atqarýshy Ásııa Shontybaevanyń málimetinshe, qazir 2 naýqastyń jaǵdaıy asa aýyr halde.

«Asylbek Mahambetov - 1978 jyly týǵan. Qazposhta jolserigi. Naýqastyń jaǵdaıy asa aýyr. Denesiniń 80%-yn kúıik shalǵan. Beti men aıaq-qoly kúıgen. Ekinshi naýqas Qaırat Maqsatuly 2009 jyly týǵan. ІІ dárejeli, denesiniń 60 paıyzyn kúıik shalǵan. Jaǵdaıy óte aýyr», - dedi ol.

Taǵy bir naýqastyń jaǵdaıy ortasha aýyr halde. Úsen Álibaev 1985 jyly týǵan. Qazposhta jolserigi. Denesiniń 29-30 paıyzyn kúıik shalǵan. Rysbek Ámirov 1982 jyly týǵan. Mańǵystaý oblysynyń turǵyny. Denesiniń 20-22% kúıik shalǵan. Maqsat Spambetov 1989 jyl týǵan. Denesiniń 40-45% kúıik shalǵan.

Eske sala ketsek, búgin tańǵa jaqyn Beıneý aýdanynda júk vagonynyn órt shyǵyp, bes adamdy kúıik shalǵan bolatyn.