Júk tasymaldaýshy 63 esirtki zaty men 43 telefondy túrmege ótkizbek bolǵan
9 shildede Qyzylorda oblysy boıynsha QAJ departamentine qarasty ZK-169/5 mekemesiniń qyzmetkerleri mekemege ótpek bolǵan KamAZ júk kóligindegi tsement salynǵan qaptardy tekserý barysynda sottalǵandardyń paıdalanýy men qoldanylýyna tyıym salynǵan zattardy tapty. Jedel túrde «102» nómirine habarlanyp, mekemege Qyzylorda qalalyq Polıtsııa basqarmasynyń jedel-tergeý toby shaqyrtyldy. Júk kóligindegi 196 qap tsementtiń jeti qabynan 10 jáne 20 gramdyq shprıtske nyǵyzdalyp salynǵan 63 dana «ózine tán erekshe ısi bar shóp tektes» zatty, 43 dana uıaly telefon, 14 dana qulaqqap, 33 dana zarıadtaý qurylǵysy, 13 dana SIM-karta, 12 dana nasybaı, 10 dana oıyn kartasy jáne úsh lıtr spırttik ishimdik tárkilendi.
Atalǵan derek boıynsha Qazaqstan Respýblıkasy QK-niń 297-babynyń 1-bóligimen sotqa deıingi tergep-tekserý amaldary júrgizilýde.