«Júk salmaǵy jumyla kótergende jeńildeıdi» - respýblıkalyq basylymdarǵa sholý
ASTANA. Sáýirdiń 2-si. / QazAqparat/ - Qazaq aqparat agenttigi respýblıkalyq basylymdarda sáýirdiń 2-si, juma kúni shyqqan ózekti materıaldarǵa sholýdy usynady.
***
Keshe Elbasy Nursultan Nazarbaev Astana qalasynyń birqatar mańyzdy nysandarynyń qurylysyn aralap kórdi. Memleket basshysynyń janynda Prezıdent Ákimshiliginiń basshysy Aslan Mýsın, qala ákimi Imanǵalı Tasmaǵambetov boldy. Osy jaı arqaý bolǵan maqala «Egemen Qazaqstan» gazetiniń juma kúngi sanynda «Jańa nysandar basty nazarda» degen taqyryppen jarııalandy.
Elbasynyń elordanyń salynyp jatqan qurylystaryn aralýyna arnalǵan maqalalar «Aıqyn», «Alash aınasy», «Ekspress K», «Lıter» gazetterinde de jarııalandy.
«Memleket basshysy Nursultan Nazarbaev Qazaqstan Respýblıkasy Parlamenti Májilisiniń Tóraǵasy Oral Muhamedjanovty qabyldady», dep jazady «Egemen Qazaqstan» gazeti. Basylymnyń habarlaýynsha, O.Muhamedjanov Prezıdentti Qazaqstan Respýblıkasy Parlamentiniń tórtinshi sessııasynyń ashylýynda Elbasynyń sóılegen sózinde jáne «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Qazaqstan halqyna Joldaýynda belgilengen mindetterdi oryndaý jónindegi palata depýtattarynyń, «Nur Otan» HDP fraktsııasynyń jumysy týraly habardar etken.
«Egemen Qazaqstan» gazetiniń jazýynsha, EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaevtyń úsh memleketke jasaǵan sapary Moldovada aıaqtaldy. «Jaqynda ǵana prezıdent saılaýyn ótkizip, eldiń saıası ómirinde jıi-jıi túndigi jelpildep, álemdi ózine qaratatyn Ýkraına astanasy - Kıevtegi alǵashqy júzdesý osy saıası oqıǵalardyń qazanyn burq-sarq qaınatýshy Joǵarǵy Radada bolyp, onyń tóraǵasy Vladımır Lıtvınmen kezdesýmen bastaldy. Taraptar eki el arasyndaǵy baılanystardyń óristeýine peıildi ekendigin tanytyp, parlamentaralyq qatynastardy da qarqyndy júrgizýdiń mańyzyna mán berdi. Eki eldiń tarıhı ortaq kezeńderin sóz ete kelip, daǵdarystan damýǵa bet alǵan osy bir ótpeli ýaqytta uqsas problemalardyń bolý zańdylyǵyna toqtaldy», dep jazady basylym.
Q.Saýdabaevtyń sapary jaıynda egjeı-tegjeıli jazylǵan «Júk salmaǵy jumyla kótergende jeńildeıdi» degen taqyryptaǵy maqalany juma kúngi nómirden oqı alasyzdar.
***
«Etten kelýi múmkin dert». «Aıqyn» gazetiniń Almaty oblystyq ishki ister departamentine silteme jasap habarlaýynsha, bıylǵy qysta juttan, tabıǵat apattarynan ólgen maldyń eti bazarlarǵa shyǵyp ketý qaýipi bar eken. Sondaı-aq jyldyń osy mezgilinde erekshe qozatyn týberkýlez taıaqshalary adamdarǵa mal eti arqyly juǵatyn kez. «Aqsý aýdanyndaǵy sý tasqyny apaty kezinde ólgen maldardy akt jasaǵannan keıin órtep, kómip tastady. Biraq qalaǵa jetkiziletin et ónimderiniń arasynda aram ólgen maldardyń eti Taldyqorǵan, Almaty bazarlaryna shyǵyp ketý qaýipi boldy», dep jazady basylym.
«Aıqyn» gazetiniń jazýynsha, Shyǵys Qazaqstan oblysynda eki kúndik is-saparmen bolǵan vıtse-premer Ómirzaq Shókeev aımaqtyń tabıǵat apatynan eń kóp zardap shekken Tarbaǵataı óńirin aralap kórgen. Sondaı-aq oblystyq tótenshe jaǵdaı shtabynyń jıynyna qatysyp, apattan qıraǵan úıler Úkimet kómegimen salynatyndyǵyn atap ótip, árbir otbasynyń múshelerine materıaldyq kómek retinde 5000 teńgeden bólinetindigin aıtqan. Sonymen qatar Ó.Shókeev apat aımaǵynda temirdeı qatań tártip ornatylýy qajet ekendigin aıta kelip, «Barlyq máselelerdi saǵyzdaı sozbalaýdyń esh qajeti joq. Kimde-kim dál osyndaı qıyn sátte óz jumysyn durys atqarmasa, naqty tapsyrmalardy oryndamasa, olardy qyzmetten bosatýǵa ázirmiz», dep shart túıipti. Óńirdegi ahýalmen egjeı-tegjeıli tanysqyńyz kelse, «Shókeev Shyǵystyń sharýasyn sheship qaıtty» degen taqyryppen basylǵan maqalaǵa nazar salyńyz.
«Aıqyn» gazetiniń dástúrli «Aq sóıle!» aıdarynyń búgingi qonaǵy - saıasattanýshy Nurlan Erimbetov. Basylymnyń san qıly saýaldaryna tuşymdy jaýap bergen saıasattanýshynyń suhbaty gazettiń juma kúngi nómirinde «Jańa býyn óz mamandyǵyna, óz sheberligine nazar aýdaryp, óz salasynyń mamany bolýǵa yntaly» degen taqyryppen jarııalandy.
***
«Alash aınasy» gazetiniń búgingi sanynda «Sýqoımalar qaýiptiń «qoımasy» bolyp tur» atty maqala basyldy. Maqalada Elbasynyń tikeleı tapsyrmasymen elimizdegi sýqoımalar men bógenderdiń, basqa da sý nysandarynyń búgingi jaı-kúıin shuǵyl tekseristen ótkizý nátıjesinde tehnıkalyq jaǵdaıy múlde syn kótermeıtin sý nysandardyń da bar ekendigi belgili bolǵany jaıly aıtylady. Almaty oblystyq bas memlekettik ekologııa ınspektory E.Qoıshybaevtyń bergen málimetine qaraǵanda Talǵar aýdanyndaǵy syıymdylyǵy 4,26 mln tekshe metrlik «Saz-Talǵar №2» sýqoımasynyń artyq sý jiberetin ajyratqysh qaqpaǵyndaǵy kótergish jartylaı isten shyqqan bolsa, 4,2 mln tekshe metrlik «Saz-Talǵar №5» sýqoımanyń ajyratqyshy da osyndaı kúıde ekendigi, Uıǵyr aýdanyndaǵy Súmbe ózeni boıyndaǵy 1985 jyly iske qosylǵan sýqoımasynyń batys bóliginiń tabanyna shuǵyl túrde kúrdeli jóndeý jumystaryn júrgizý qajettigi anyqtalǵan. Basylym osyndaı aqaýlardyń birqataryn tizip kórsetken. «Bul usaq-túıek nárse emes. Mundaı eleýsizdeý kórinetin keleńsizdiktiń Qyzylaǵashta qandaı qaıǵyly oqıǵaǵa ushyratqanyn sýqoıma ıeleri esten shyǵarmaǵandary jón», dep jazady basylym.
Basylymnyń órkenıet betinde «Balalar ádebıeti beı-jaılyqty kótermeıdi» atty maqala jaryq kórdi. «Búgin dúnıejúzi boıynsha balalar kitabynyń kúni atalyp ótýde. Munyń ózi balalar ádebıetiniń qaı ult úshin de zor mańyzǵa ıe ekendigin kórsetse kerek. Búgingi búldirshin - erteńgi úlken ádebıettiń birden-bir oqyrmany. Sol sebepti de ony kitapqa erte bastan baýlý, ádebıetke degen súıispenshiligin bala jasynan arttyrý - meılinshe ózekti másele», dedi maqala avtory. Balalar ádebıeti ózińizdi beı-jaı qaldyrmasa, basylymnyń juma kúngi sanynda jarııalanǵan maqalaǵa nazar salyńyz.
«Semeıde jasy 102-ge aıaq basqan Uly Otan soǵysynyń ardageri baspanasyz otyr», dep jazady «Alash aınasy» gazeti. 15 jyldan artyq ýaqyt páter kezeginde turǵan Sydyq Túmenbaev qazir jalǵyz ulynyń qolynda otyr. Baspana bolǵanymen, qartqa qolaısyz. Qalt-qult etip júrgen maıdangerdiń ásirese qystygúni syrtqa kirip-shyǵýy muń. Qazir densaýlyǵy syr bere bastaǵan qarttyń «o dúnıege óz bosaǵamnan attansam» degen armany bar.
***
«Keshe Premer-Mınıstr Kárim Másimov Orys pravoslavıe shirkeýi Astana jáne Almaty eparhııasynyń jańa basshysy arhıepıskop Aleksandrmen kezdesti», dep jazady «Kazahstanskaıa pravda» gazeti.
Basylymnyń Premer-Mınıstrdiń baspasóz qyzmetine silteme jasap habarlaýynsha, K.Másimov arhıepıskop Aleksandrdy onyń mıssııasynyń bastalýymen quttyqtap, oǵan jemisti de tabysty qyzmet tiledi.
