Júk poıyzyna minip, ákesine bara jatqan eki balanyń bireýi aýrýhanada kóz jumdy

NUR-SULTAN. QazAqparat – Jambyl oblysynda júk poıyzyna minip, ákesine barmaq bolǵan balalardyń biri poıyzdan sekirgen kezde alǵan jaraqatynan kóz jumdy. Bul aqparatty Jambyl oblysy ákimdiginiń baspasóz qyzmeti rastady, dep habarlaıdy QazAqparat tilshisi.

Ákimdik málimetinshe, keshe túngi saǵat 23:00-de Talas aýdandyq ortalyq aýrýhanasynyń qabyldaý bólimine 2015 jyly dúnıege kelgen Ramazan Rahatuly jedel járdem kóligimen jetkizilgen.

Jeti jasar sábı arýhanaǵa jetkende es-tússiz, jaǵdaıy óte aýyr bolǵan.

Bala Jambyl oblysyna qarasty Bılikól aýyly tusynda júrip kele jatqan júk poıyzynan sekirip túsken kezde aýyr jaraqat alǵan.

Bala dereý jansaqtaý bólimine jatqyzylyp, reanımatsııalyq shuǵyl medıtsınalyq kómek kórsetildi.

Ókpeni jasandy jeldetý apparatyna qosylyp, Taraz qalasynan sanavıatsııamen neırohırýrg dáriger jetkizilgen.

Alaıda, sábı jaraqatynyń aýyr bolýy saldarynan búgin saǵat 11:40-ta kóz jumdy.

Al 2013 jyly dúnıege kelgen Qumgeldi Nurálı Rahatulynyń mıy shaıqalǵan, oń jaq samaı tusynda jaraqaty bar.

Ol Talas aýdandyq ortalyq aýrýhanasynyń hırýrgııa bólimine jatqyzyldy. Jalpy jaǵdaıy ortasha aýyr dep baǵalanyp otyr.

Buǵan deıin Jambyl oblysynda ákesin saǵynǵan eki bala eshkimge aıtpaı júk poıyzymen sapar shekkenin habarlaǵan edik.