Júk poıyzymen qonaqqa barmaq bolǵandar ustaldy – Aqtóbe oblysy
NUR-SULTAN. QazAqparat - Tótenshe jaǵdaı kezinde júk poıyzymen Aqtóbeden Qandyaǵashqa qonaqqa barmaq bolǵan 5 adam ustaldy. Bul jaıynda QR ІІM Kóliktegi polıtsııa departamentinen málim etti, dep habarlaıdy QazAqparat tilshisi.
Tótenshe jaǵdaı kezinde temirjol kóliginiń qozǵalysyna shekteý engizilgenine qaramastan, azamattar túrli joldarmen elimiz óńirlerine saparlaýǵa tyrysyp jatady. Máselen, Qandyǵash stansasynyń jelilik polıtsııa bóliminiń qyzmetkerleri júk poıyzymen Aqtóbe stansasynan Qandyaǵash stansasyna (Aqtóbe oblysynyń Muǵaljar aýdany) deıin barmaq bolǵan 5 adamdy ustady.
«Polıtsııa qyzmetkerleri quqyq buzýshylardyń Qyzylorda men Aqtóbe oblystarynyń týmasy, jastary 23 pen 56 jas aralyǵynda ekendigin anyqtady. Atalǵan tulǵalarǵa qatysty QR Ákimshilik quqyq buzýshylyq týraly kodekstiń 476-baby 6-bóligi boıynsha ákimshilik materıal toltyryldy», - dep atap ótedi vedomstvodan.
Sondaı-aq kólik polıtseıleri Qaraǵandy-Jolaýshylar stansasynyń temirjol vokzaly perronynda qandaı da bir qujatsyz júrgen Qaraǵandy jáne Jezqazǵan qalalarynyń eki turǵynyn ustady. Qaraǵandy qalalyq mamandandyrylǵan aýdanaralyq ákimshilik sotynyń sheshimimen eki azamat da ákshilik quqyq buzýshylyq jasady dep tanyldy jáne 2 táýlikke ákimshilik qamaýǵa alyndy.
