Júk kólikterine arnalǵan shekteý: Almatyda 3 myńnan astam júrgizýshi jaýapqa tartyldy

Shekteý bilikke túsetin júktemesi 8 tonnadan asatyn júk kólikterine kún saıyn saǵat 07:00–den 22:00–ge deıin Saın kóshesi — ál-Farabı dańǵyly — Shyǵys aınalma avtomobıl joly (ShAAJ) — Rysqulov dańǵyly aralyǵyndaǵy aýmaqta qoldanylady.

Kazinform agenttigi qalalyq polıtsııa departamenti men qala ákimdigine júginip, bul sharanyń 2 aı ýaqyt ishinde qandaı nátıje bergenin surady.

Jol qozǵalysy jáne jolaýshylar kóligin uıymdastyrý basqarmasy óz jaýabynda atalǵan shekteý kóshe-jol jelisiniń ótkizý qabiletin arttyrý, qalanyń negizgi magıstraldyq kóshelerine túsetin kólik júktemesin azaıtý maqsatynda engizilgenin atap ótti.

— Tyıym salynǵan aımaq boıynsha júrgizýshilerdi aqparattandyrý maqsatynda 3.4 jol belgileri (júk avtomobılderiniń qozǵalysyna tyıym salynǵan) ornatyldy. Júk tasymaldaýdy júzege asyratyn júrgizýshiler belgilengen jol belgileriniń jáne jol qozǵalysy erejeleriniń talaptaryn qatań saqtaı otyryp, júrý baǵyttaryn josparlaý qajet, — dep habarlady vedomstvodan.

Sonymen qatar basqarma ókilderi engizilgen shekteýdiń aımaǵyn keńeıtý ne qoldanystaǵy shekteýlerdiń kúshin joıý josparlanbaǵanyn atap ótti.

Al Almaty qalasynyń polıtsııa departamenti shekteý qandaı júk kólikterine qatysty ekenin naqtylady:

— Aýyr júk samosvaldary (mysaly, qurylys materıaldaryn, qıyrshyq tas, qum tasıtyn kóp osili «KrAZ», «MAZ», «KAMAZ», «Howo», «Shacman» sııaqty úlken júk kólikteri);
— Úlken fýralar (halyqaralyq jáne qalaaralyq tasymaldaýmen aınalysatyn uzyn tirkemeli júk kólikteri);
— Arnaıy tehnıkalar (beton aralastyrǵyshtar — mıkserler, avtokrandar, jol jóndeýge nemese qurylysqa arnalǵan aýyr salmaqty mashınalar).

— «Bilikke túsetin júktemesi 8 tonnadan asatyn júk kóligi» degen uǵym — úlken, aýyr jáne salmaǵy óte joǵary júk kólikterin bildiredi. Sondyqtan shekteý kishigirim gazelderge nemese jeńil júk kólikterine qatysty emes. Eger kólikke tıelgen júkpen qosa alǵandaǵy salmaǵy jolǵa 8 tonnadan artyq qysym túsirse, onda bul kólikterge 07:00–den 22:00–ge deıin qalanyń ortalyq bóligine kirýge qatań tyıym salynady. Bul shekteý, eń aldymen, qala joldaryn aýyr salmaqtan qorǵaý jáne asfalttyń merziminen buryn buzylýyn boldyrmaý úshin qajet, — dep habarlady departamentten.

Almaty polıtsııasy qala aýmaǵynda júk kólikteriniń qozǵalysyna engizilgen shekteý talaptarynyń saqtalýyna kúndelikti baqylaý júrgizilip jatqanyn málimdedi. Qazirge deıin júk kólikterine qoıylǵan shekteý talaptaryn buzǵan 3 700-den astam júrgizýshi ákimshilik jaýapkershilikke tartylǵan. Jol qozǵalysy erejelerin qasaqana buzǵan jáne qalanyń kólik ahýalyna kedergi keltirgen 50-den astam júk kóligi arnaıy aıyppul turaǵyna qoıylǵan.

Polıtsııa málimetinshe, búginde shekteý aımaǵynda quqyq buzýshylardy anyqtaý jáne olardyń aldyn alý jumystary negizinen patrýldik polıtsııa ekıpajdarynyń kúshimen júzege asyrylyp keledi. Patrýldik polıtsııasynyń ınspektorlary Saın kóshesi, ál-Farabı dańǵyly, ShAAJ dańǵyly boıyndaǵy kireberis joldar men túıisken núktelerde qyzmet atqarady.

— Patrýldik ekıpajdar ruqsat etilgen ýaqytta (07:00-den 22:00–ge deıin) kórsetilgen aýmaqqa kirgen aýyr júk kólikterin toqtatyp, olardyń júk kótergishtigin, bilikke túsetin salmaǵyn jáne tıisti ruqsatnamalaryn qujat júzinde tekseredi. Erejeni buzǵan júrgizýshiler anyqtalǵan jaǵdaıda, patrýldik polıtsııa qyzmetkerleri dereý QR ÁQBtK-ge sáıkes ákimshilik hattama toltyryp, qajet bolǵan jaǵdaıda kólikti arnaıy aıyppul turaǵyna ornalastyrady, — delingen departament jaýabynda.

Sondaı-aq polıtsııa atalǵan shekteýdiń alǵashqy nátıjeleri birqatar oń ózgeristi kórsetkenin atap ótti. Onyń ishinde negizgi magıstraldy kóshelerde kólik qozǵalysynyń tyǵyzdyǵy aıtarlyqtaı tómendegen. Ásirese tańǵy jáne keshki qarbaıyn saǵattarynda kólikterdiń júrisi jeńildegen. Aýyr júk kólikteriniń qatysýymen bolatyn apattardyń sany azaıyp, jol qaýipsizdigi deńgeıi artqan.

— Qala aýmaǵynda jol qozǵalysynyń qaýipsizdigin qamtamasyz etý jáne azamattardyń jaıly ómir súrýin baqylaý jumystary polıtsııa departamentiniń turaqty baqylaýynda, — dep atap ótti departamentten.

Eske salaıyq, «QazAvtoJol» júk kóliginiń salmaǵyn ólsheýden jaltarǵandarǵa jaýapkershilik engizýdi usyndy.