Júk kólikterin zańsyz tirkeýmen aınalysqan toptyń sybaılasy Reseıden ekstradıtsııalandy

ASTANA. KAZINFORM – Qazaqstan Respýblıkasynyń Bas prokýratýrasy shetelden ákelingen júk kólikterin Jetisý oblysynda zańsyz rásimdeýmen aınalysqan qylmystyq toptyń múshesin Reseı Federatsııasynan ekstradıtsııalady. Bul týraly Bas prokýratýranyń baspasóz qyzmeti habarlady. 

Kúdikti «Azamattarǵa arnalǵan úkimet» memlekettik korporatsııasy» KAQ-nyń mamany bola tura, uıymdasqan qylmystyq top quramynda 2022-2023 jyldar aralyǵynda avtokólik ıelerin izdep taýyp, alǵashqy tirkeý alymdary boıynsha tólemder týraly kórineý jalǵan málimetterdi aqparattyq júıesine engizý arqyly olardyń kólik quraldaryn zańsyz tirkegen.

Qylmystyq is-áreketterdiń nátıjesinde 481 kólik quraly zańsyz esepke qoıylyp, bıýdjetke mindetti tólemderdiń túspeýi túrinde 3,7 mlrd teńgege asa iri mólsherdegi memleketke zalal keltirilgen.

Qylmystardy jasaǵannan keıin kúdikti jasyrynyp, oǵan halyqaralyq izdeý jarııalanǵan.

Bıylǵy jyldyń naýryz aıynda ol Máskeý oblysynda ustalyp, Qazaqstan Respýblıkasy Bas prokýratýrasynyń suraýy boıynsha otanyna ekstradıtsııalandy.

Qazirgi tańda kúdikti tergeý ızolıatoryna qamaldy. 

Qylmystyq zańnamaǵa sáıkes oǵan taǵylǵan aıyp boıynsha múlki tárkilenip, 5 jyldan 10 jylǵa deıin merzimge bas bostandyǵynan aıyrý jazasy kózdelgen. 

Bas prokýratýra shetelde jasyrynyp júrgen tulǵalardy izdestirý jáne olardy jaýaptylyqqa tartý boıynsha júıeli jumysty jalǵastyrýda.