Júk kólikteriniń ruqsat qujatynan paıda tabatyndardyń joly kesilmek

NUR-SULTAN. QazAqparat – QR IIDM Kólik komıteti halyqaralyq deńgeıde júretin júk tasymaldaýshylarǵa ruqsat qujatyn tapsyrý jumysyn avtomattandyrǵaly otyr, dep habarlaıdy QazAqparat tilshisi.

«Kólik komıteti «Ruqsat qujattary men tasymal monıtorıngin basqarý» aqparattyq júıesin daıyndap jatyr. Ol júıe sheteldik ruqsat blankisin paıdalanýdy baqylaýǵa, qazaqstandyq blankini berý júıesin avtomattandyrýǵa, qazaqstandyq tasymaldaýshylardyń shet elderge shyǵý ruqsatyn jasaýǵa, sheteldik tasymaldaýshylar úshin qazaqstandyq blankini tapsyrý jáne onyń kúshin joıý jumystaryn avtomattandyrýǵa arnalǵan», - dedi Kólik komıteti tóraǵasynyń orynbasary Danııar Qospabaev Sybaılas jemqorlyqqa qarsy is-qımyl agenttiginde ótken baspasóz máslıhatynda.

Komıtet ókiliniń aıtýynsha, atalǵan júıe sheteldik ruqsat qujattaryn qymbat baǵamen qaıta satyp, paıda taýyp júrgenderdiń jolyn kesedi. Sebebi, aýyr júk kólikteriniń qaltasyn qaqqan pysyqaılar ruqsat blankileriniń tapshylyǵyn qoldan jasap otyrǵan kórinedi.

Eske sala ketsek, Danııar Qospabaev budan buryn aýyr júk kólikteriniń osine túsetin salmaqty ólsheý júıesi avtomattandyrylatynyn habarlaǵan bolatyn. Onyń aıtýynsha, bul júıe iske asqan jaǵdaıda aýyr júk kólikteriniń osine túsetin salmaqty ınspektorlar teksere almaıdy.