Júk kóligin aıdap ketken Qapshaǵaı turǵyny ustaldy
TALDYQORǴAN.QazAqparat - Almaty oblysynyń polıtseıleri júk kóligin zańsyz aıdap ketken 49 jastaǵy kúdikti azamatty qolǵa túsirdi, dep habarlaıdy QazAqparat tilshisi.
Anyqtalǵandaı, "Hovo" markaly kólikti urlaǵan kúdikti jol salyp jatqandardyń biri bolyp shyqty. Kólik kúzetilmeıtin avtoturaq aýmaǵynan áketilgen. Al birneshe saǵattan keıin tártip saqshylary Qapshaǵaı qalasyna jaqyn jerden kólikti tapty.
«Ekspert-krımınalısterdiń aralasýymen mashınadaǵy saýsaq izderi kimge tıesili ekeni belgili boldy. Sebebi saýsaq izderi polıtseılerdiń málimetter bazasynda buryn isti bolǵan 49 jastaǵy azamattyń saýsaqtarymen sáıkes bolyp shyqty. Sondaı-aq polıtseılerdiń kúdigin kýágerlerdiń bergen aqparaty da seıiltti. Al tártip saqshylaryna 49 jastaǵy azamat birden kinásin moıyndady», dep tolyqtyrdy Almaty oblystyq ІІD baspasóz qyzmeti.
Qazirgi tańda sot aldy tergeý amaldary bastaldy. Ustalǵan azamattan eshqaıda ketpeýi týraly qolhat alynyp, ýaqytsha úıine bosatyldy.
Málimetter bazasyna súıený arqyly jyl basynan beri polıtsııa qyzmetkerleri qylmys ornyndaǵy aıǵaq zattar kómegimen 10 qylmyskerdi tutqyndap, jaýapqa tartty.
