Júk kóliginiń nómirin ózgertken júrgizýshi bir jylǵa kólik basqarý quqyǵynan aıyryldy
ASTANA. KAZINFORM — Júk kóliginiń nómirin oqylmaıtyndaı etken júrgizýshi jazalandy, dep habarlaıdy QR ІІM baspasóz qyzmeti.
Kókshetaý — Astana tasjolynda elordalyq polıtseıler Scania júk kóligin toqtatty.
Tekserý barysynda júrgizýshiniń memlekettik tirkeý nómirindegi keıbir áripter men sandardy ızolentamen ózgertip, nómirdi oqýdy qıyndatýǵa tyrysqany anyqtaldy.
— 54 jastaǵy shetel azamaty ákimshilik jaýapkershilikke tartyldy. Sot sheshimimen ol bir táýlikke ákimshilik qamaýǵa alynyp, bir jylǵa kólik basqarý quqyǵynan aıyryldy, — deıdi tártip saqshylary.
Polıtsııa kólik nómirin qasaqana jasyrý nemese ózgertý zań boıynsha jaýapkershilikke ákep soǵatynyn eskertedi.
Buǵan deıin Qazaqstan nómirin Grýzııanikimen jasyryp júrgen júrgizýshi jazalanǵanyn jazdyq.