Júk kóligimen ınspektordyń aıaǵyn basyp ketken - Atyraýda polıtsııadan qashqan júrgizýshi oq atyp toqtatyldy

Atyraýda polıtsııadan qashqan júrgizýshi júk kóligimen ınspektordyń aıaǵyn basyp ketti. Polıtsııa qyzmetkerleri ony toqtatý úshin kólik dóńgelegine, aspanǵa eki retten oq atýǵa májbúr boldy, dep habarlaıdy Kazinform.

Oblystyq polıtsııa departamentiniń baspasóz qyzmetinen málim etkendeı, oqıǵa keshe, 17 qarashada bolǵan.

«Polıtsııa qyzmetkerleri jergilikti ýaqytpen saǵat 11:45 shamasynda Atyraý-Oral tasjolynyń 183-shaqyrymy tusynda DALMLERCHR SLER avtokóliginiń jyldamdyq asyrǵanyn anyqtady. Alaıda, kólik júrgizýshisi patrýldik polıtsııa ınspektorlarynyń zańdy talabyna baǵynbady. Sol sebepten, Inderbor kentinde qyzmettik kóliktermen aldyn bógep, toqtatyldy. Kólik toqtatylǵanymen, júrgizýshi kabınadan túspesten qashyp qutylýǵa tyrysty. Sol kezde patrýldik polıtsııa ınspektorynyń oń aıaǵyn basyp ketip, jol boıyndaǵy birneshe avtokólikke avarııalyq jaǵdaı týdyrdy. Zańdy talapqa baǵynbaǵan júrgizýshi kóliginiń dóńgelegine eki márte jáne eki ınspektor eskertý maqsatynda aspanǵa eki retten oq atty», - dep habarlady departamenttiń baspasóz qyzmeti.

Kólik tas jol boıynda toqtatylyp, júrgizýshi ustaldy. Rýlde bolǵan 1989 jylǵy júrgizýshi medıtsınalyq saraptamadan ótkizildi. Júrgizýshiniń mas kúıde bolmaǵany anyqtaldy. Ol kóliktiń óziniki emes ekenin aıtyp, aqtalýǵa tyrysqan.

Qazir ustalǵan júrgizýshige qatysty QR Ákimshilik quqyq buzýshylyq týraly kodeksiniń 592-baby 2-bóligimen, 601-baby 1-bóligimen, 606-baby 1-bóligimen, 613-baby 1-bóligimen hattama toltyryldy. Sondaı-aq, QR Qylmystyq kodeksiniń 380-babynyń 3-bóligimen, (Bılik ókiline qatysty qorqytý nemese kúsh kórsetý áreketteri) qylmystyq is tirkeldi. Júrgizýshi qamaýǵa alyndy.

Eske sala ketelik, buǵan deıin Atyraý oqýshylary kólik júrgizýshilerine jol erejesin saqtaý týraly hat joldaǵanyn jazǵan edik.