Jýylmaǵan jemis pen gıgıena: A gepatıtinen qalaı saqtaný qajet
ALMATY. KAZINFORM – Almaty qalasynyń sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly vırýsty A gepatıtiniń aldyn alý joldaryn túsindirdi.
Onyń aıtýynsha, A gepatıti – baýyrdy zaqymdaıtyn jedel vırýsty aýrý. Ol negizinen aýrý adamnan juǵady.
– A gepatıti vırýsy naýqas adamnyń nájisimen bólinip shyǵyp, fızıkalyq jáne hımııalyq áserlerge tózimdi bolǵandyqtan, uzaq ýaqyt qorshaǵan ortada saqtalady. Las taǵam men sýdy paıdalanǵanda nemese aýrý juqtyrǵan adammen tikeleı qarym-qatynasta bolǵanda, las sýlarda shomylǵanda jáne jeke bas gıgıena erejelerin saqtamaǵan jaǵdaılarda aýrý juǵady, - dedi Almaty qalasynyń Bas sanıtarııalyq dárigeri.
2026 jyldyń 4 aıynda megapolıs turǵyndary arasynda A gepatıtiniń 21 jaǵdaıy tirkelgen. Onyń ishinde 7 jaǵdaı (33,3%) – 14 jasqa deıingi balalar, 1 jaǵdaı (4,7%) – jasóspirim, 13 jaǵdaı (61,9%) – eresekter arasynda bolǵan. Qasymhan Alpysbaıuly 2025 jyldyń osy kezeńimen salystyrǵanda aýrý juqtyrý kórsetkishi 3,3 esege tómendegenin atap ótti.
– Naýqastardan alynǵan saýalnamalarǵa sáıkes, ınfektsııanyń negizgi taralý joldary: kúndelikti turmystaǵy qarym-qatynas (14,2 %), sapasyz jýylǵan kókónister men jemisterdi tutyný (38%), jeke bas gıgıenasynyń erejeleri durys saqtalmaýy (47,6%), - dedi ol.
Sonymen qatar Qasymhan Alpysbaıuly búginde vırýsty A gepatıtiniń aldyn alýdyń eń tıimdi ádisi vaktsınatsııa ekenin eske saldy. A gepatıtine qarsy ekpe josparly túrde eki ret 2 jastaǵy balalarǵa jáne epıdemıologııalyq kórsetkish boıynsha 14 jasqa deıingi balalarǵa turǵylyqty meken-jaıy boıynsha emhanalarda tegin júrgiziledi.
Eske salaıyq, AQSh-tyń jeti shtaty laınerdegi hantavırýs juqtyrǵan jolaýshylardy baqylaýǵa aldy.
