Júgirýden «Nur-Sultan parki Challenge 2020» onlaın-jarysynyń jeńimpazdary anyqtaldy
NUR-SULTAN. QazAqparat - Álemniń túkpir-túkpirinen kelgen 600-den astam sportshy «Nur-Sultan parki Challenge 2020» onlaın-júgirý jarysyna qatysty, dep habarlaıdy QazAqparat tilshisi.
Elorda ákimdiginen málim etkendeı, júgirýden «Nur-Sultan parki Challenge 2020» onlaın-jarysy 5-6 qyrkúıek kúnderi ótti. Búgin jeńimpazdardyń esimi jarııalandy.
Ekikúndik jarys elordanyń Ortalyq saıabaǵynda uıymdastyryldy. Biraq oǵan arnaıy mobıldik qosymsha arqyly álemniń túrli elderinen sportshylar qatysa aldy.
Jarysqa jalpy 600-den astam adam qatysty. Latvııa, Reseı, Italııa, Shvetsııa, Belarýs jáne Qazaqstannyń kóptegen qalalarynan kásibı sportshylar keldi.
Jarystyń jeńimpazy – Reseı Federatsııasynyń jeńil atletıka quramasynyń múshesi Alla Sıdorova boldy.
Tatıana Neroznak – qashyqtyqqa júgirýge mamandanǵan QR Ulttyq quramasynyń sportshysy, ekinshi júldeli orynǵa ıe boldy.
Dmitrijs Serjogins – kásibı sportshy, jeńil atletıkadan Latvııa quramasynyń múshesi, jalpy esepte úshinshi orynǵa ıe boldy.
Dalaly alqapta 5 km júgirgen Atyraý oblysynyń turǵyny Jalǵas Muǵamılınge de júlde buıyrdy.
Aıta keteıik, júldeli oryndarǵa ıe bolǵan qatysýshylar óz júldelerin qaıyrymdylyq maqsatqa jumsady.
Jarysty elordalyq «Magic park Astana» parkiniń basqarýshy kompanııasy, Qazaqstan Respýblıkasynyń jeńil atletıka federatsııasy jáne Nur-Sultan qalasynyń ákimdigi uıymdastyrdy.
