Júgeriniń densaýlyqqa paıdasy bar ma?
ASTANA. QazAqparat - Júgeri tek dámdi azyq qana emes, densaýlyqqa óte paıdaly, dep jazady anabol.kz.
Júgeriniń quramy mono jáne dısaharıdterge, qanyqpaǵan maı qyshqyldaryna, sý, krahmalǵa óte baı. Sondaı-aq onyń quramynda V9, E, RR, V1, V2, V5, S dárýmenderi jáne nıatsın, holın bar. Bul ónim - quramyndaǵy temirdiń kóptiginen chempıon.
Ǵylymı zertteýlerdiń nátıjesinde, júgeriniń joǵary taǵamdyq jáne bıologııalyq belsendiligi dáleldengen. Eger siz osy ónimdi kúndelikti ratsıonyńyzǵa qossańyz, aǵzańyzda zat almasý protsessi aıtarlyqtaı jaqsarady. Nátıjesinde, densaýlyǵyńyz da jaqsaryp, ımmýnıtetińiz kúsheıedi. Qýyrylǵan júgerige qaraǵanda, qaınatylǵan júgeri paıdaly bolady. Qaınatylǵan júgeri teriniń qartaıýyn tejeıdi jáne qaterli isik damýyn boldyrmaıdy. Sonymen qatar, zat almasý buzylǵan kezde, baýyr aýrýy, júrek-qan tamyrlary aýrýyn emdeý kezinde paıdaly. Júgerini ót tasy, holangıt jáne holetsıstıt belgilerin jeńildetý úshin paıdalanýyńyzǵa bolady. Gastrıt kezinde untaqtalǵan júgeri sorpasyn paıdalaný usynylady. Onyń asqazannyń shyryshty qabatyna da paıdasy kóp.
