Júgeri satýshy polıtsııaǵa taǵy qarsylyq kórsetti
ALMATY. QazAqparat – Almatydaǵy Tuńǵysh Prezıdent baǵynda júgeri satýshy jigit ustalǵan kezinde polıtsııa qyzmetkerlerine taǵy qarsylyq kórsetti, dep habarlaıdy QazAqparat tilshisi.
Qalalyq polıtsııa departamentiniń málimetinshe, Bostandyq aýdanynyń polıtsııa basqarmasynyń jergilikti polıtsııa qyzmeti reıd jumystaryn júrgizgen. Reıd barysynda QR Tuńǵysh Prezıdenti baǵynda jappaı saýda júrgizilip jatqany anyqtalǵan.
12 qyrkúıekte zańsyz júgeri satýshy jigitke ákimshilik jaza taǵaıyndalǵan bolatyn.
«Quqyq buzǵan adamnyń zańǵa qarsy áreketine tosqaýyl qoıý barysynda ol polıtsııa qyzmetkerleriniń talabyna qarsylyq bildirdi. Sol úshin Ákimshilik kodekstiń 667-baby boıynsha ákimshilik jaýapkershilikke tartyldy», - dep habarlaıdy polıtsııa departamentinen. Sonymen qatar D-ǵa qatysty Ákimshilik kodekstiń 204-baby 2-bóligi boıynsha da (birneshe ret jasalǵan zańsyz saýda) ákimshilik hattama toltyrylǵan.
Alaıda, oǵan qaramastan saýdager keshe taǵy zańsyz saýdasyn jalǵastyrǵan.
13 qyrkúıekte turǵyndardyń shaǵymynan soń polıtsııa zań talabyn buzǵan azamatty ustady.
«102 nómirine Dýlatı kóshesinde jabaıy saýda jaıylǵany týraly habarlama tústi. Oqıǵa ornyna ýchaskelik ınspektor keldi. Ákimshilik hattama toltyrý kezinde er adam polıtsııa qyzmetkerine qarsylyq kórsetti. Polıtsııa qyzmetkerine judyryq ala júgirgen ol ustalyp, aýdandyq PB jetkizildi»,- dedi basqarma basshysy Dáýren Ýtebaev.
Bul derek QR QK 380 babymen sotqa deıingi tergeý isi reestrinde tirkeldi.
Aıta keteıik, buǵan deıin polıtsııa júgeri satýshyny ustaý týraly vıdeo taratqan bolatyn.
