Judyryǵy myqty, talaby taýdaı Dına
Dına Jolaman - byltyr Astana qalasynda Rıo-de-Janeırodaǵy jazǵy Olımpıadaǵa joldama sarapqa salynǵan saıysta altyn medaldy jeńip alyp, álem chempıony atanǵan qarshadaı qazaq qyzy. 67 elden 285 boksshy qatysqan osy dúbirli dodada 54 keli salmaq dárejesinde saıysqa túsken aqmolalyq sportshy qarsylastarynyń bárin jeńip, álem chempıony atandy.
Áıelder arasyndaǵy boks búginde olımpıadalyq oıyndar tizimine engen sporttyń eń tanymal túri bolyp sanalady. Dınanyń bokstaǵy joly Jaqsy kentindegi «TNK agrofırmasynyń» qoldaýymen ashylǵan T.Ýálıev atyndaǵy sport mektebinde bastalǵan. Qyzdardyń aýyr atletıka, boks sııaqty úlken kúshti qajet etetin sport túrlerimen aınalysýy búginde eshkimniń tańdanysyn týdyrmaıdy. Sodan bolar, onyń bokspen aınalysqanyna týǵan-týystary da qarsy bola qoımaǵan.
Sportshynyń álem chempıonyna deıingi joly birden jáne kezdeısoq samǵaý arqyly emes, satylap ósýmen jáne kóp ter tóge otyryp jattyǵýdyń arqasynda keldi. Ol bul tabysqa jetýde óziniń bapkeri, halyqaralyq dárejedegi sport sheberi Aleksandr Vysotskııdiń sińirgen eńbeginiń zor ekendigin eshqashan umytpaıdy. Eki dúrkin respýblıka chempıony bolǵan Dına 2014 jyly Ońtústik Koreıada ótken halyqaralyq jarysta besinshi satydan kórinip, bolashaǵynan úlken úmit kúttiretin sportshy ekenin kórsetti. Mundaı dúbirli jarysqa alǵash qatysqan jas sportshy úshin bul az tabys emes. Sondaı-aq, bul jetistik oǵan halyqaralyq dárejedegi sport sheberi ataǵyn alýǵa yqpalyn tıgizdi.
Astanada ótken jarysqa qaıta oralsaq, bul - dál Olımpıada oıyndary qarsańynda ótken asa jaýapty da kúrdeli syn bolǵan edi. Jarys júldegeri Olımpıadaǵa joldama da alýy tıis-tin. Sondyqtan sportshylar jeńis úshin janyn salyp baqty. Dınanyń qarsylastary talaı jarystarda top jarǵan kil myqtylar boldy.
Degenmen, olardyń ataq-dańqy, burynǵy jeńisteri jas boksshynyń boıyna úreı uıalata qoıǵan joq. Nemis sportshysy Orneleı Vahnerdi 3:0 esebimen utqan ol qytaılyq Aııa Shınmatony da sondaı eseppen tize búktirdi. Fınalda taǵy bir qytaılyq Lıý Pıapıaony da 3:0 esebimen anyq basymdyqpen jeńdi. Sóıtip, elimiz tarıhynda áıelder arasynda ekinshi álem chempıony atandy.
Ókinishke oraı, Dına Rıo-de-Janeıroda ótetin Olımpıadaǵa bara almady. Óıtkeni, onyń salmaǵy Olımpıada oıyndaryna kiretin salmaq ólshemine enbedi. Olımpıadada áıelder boksynda úsh salmaq - 51, 60 jáne 75 keli salmaqtary ǵana qarastyrylǵan. Degenmen, bul jasyndaı jarqyrap, bıikke umtylǵan talantty sportshynyń jolynda tosqaýyl bola almaıdy. Ony aldynda áli de talaı dúbirli jarystar kútip tur.
