Juban Moldaǵalıevtyń týǵanyna 100 jyl: Elordalyq fılarmonııa onlaın kesh ótkizdi
Kórermender bul joly tikeleı efırden, «Men – qazaqpyn» poemasynyń avtory, jaýynger aqyn Juban Moldaǵalıevtyń shyǵarmashylyq muralaryn tyńdap, jarqyn lebizderimen bólisti.
«Bıyl aqynnyń dúnıege kelgenine 100 jyl tolyp otyr. Osyǵan baılanysty onlaın ádebı-mýzyka keshin ótkizip, aqynnyń rýhyna taǵzym etýdi paryz sanap otyrmyz. Qıyn zamanda jasqanbaı, «Men – qazaqpyn» dep qasqaıyp, eliniń rýhyn kótergen aqynnyń esimi halyq jadynan eshqashan óshpeıdi», - deıdi fıarmonııa ujymy.
Elorda fılarmonııasy uly tulǵalardy ulyqtap, ataýly merekelerdi dáripteıtin onlaın keshterdi ótkizýdi jalǵastyratyn bolady.
Juban Moldaǵalıev (1920-1988) - iri epık aqyn, KSRO Memlekettik syılyǵynyń laýreaty, Qazaqstannyń Halyq jazýshysy 1920 jyly Oral oblysynyń (qazirgi Batys Qazaqstan obl.) Taıpaq aýdany, Jylandy degen jerde dúnıege keldi. Jetijyldyq mektepte, Oral aýyl sharýashylyǵy tehnıkýmynda, áskerı-saıası kýrstarda bilim aldy. 1940-1947 jyldary ásker qatarynda bolyp, soǵysqa qatysty. Tuńǵysh óleńder jınaǵy Jeńis jyrlary atymen jaryq kórdi. Soǵystan keıin baspasózde, Qazaqstan Jazýshylar Odaǵynda basshylyq qyzmet atqardy. KSRO Mınıstrler Keńesiniń Lenındik jáne Memlekettik syılyqtar jónindegi kollegııasynyń múshesi boldy. Alǵash 1939 jyly gazet betine basylǵan óleńinen bergi jyldar ishinde alpystan astam kitaby jaryq kórdi. «Kisen ashqan», «Qyran dala», «Sel», «Men – qazaqpyn» poemalary úshin eń joǵarǵy Memlekettik syılyqtarmen marapattaldy. Shyǵarmalary aǵylshyn, nemis, frantsýz, polıak, ıspan, vengr, arab, mongol tilderine aýdarylǵan. 1986 jyly Jazýshylar odaǵynda G.V.Kolbınmen ótken kezdesýde basyn qaterge tige otyryp, jastar qozǵalysyn qoldady. Aqyn qazaq halqynyń tarıhy týraly «Men – qazaqpyn» atty tolǵaýynda halqynyń atynan minbege shyǵyp sóıleı otyryp, tarıhı shyndyqty, halyqtyń epıkalyq ómirin kesteledi. San túrli taqyryptaǵy lırıkalyq shyǵarmalarynda týǵan jer, Otan, óz ultyna degen súıispenshilik, qazaq tili, onyń taǵdyry, ana, áıel, mahabbat, soǵys jáne beıbitshilik, zamandastar beınesin arqaý etti.
