Jýalylyq turǵyn 4 kelige jýyq «gashısh» esirtkisin kómbede jasyrǵan

TARAZ. QazAqparat – Jambyl oblysy Polıtsııa departamentiniń Esirtki qylmysyna qarsy is-qımyl basqarmasynyń qyzmetkerleri jedel aldyn alý is-sharalaryn júrgizý barysynda Jýaly aýdanynyń 46 jastaǵy turǵynyn ustady, - dep habarlaıdy QazAqparat.

Ustalǵan kúdiktiden salmaǵy 3 keli 600 gramm bolatyn «gashısh» esirtkisi tabylǵan. Ol ony kómbede jasyryn saqtaǵan. Bul týraly oblystyq polıtsııa departamentiniń bastyǵy Arman Orazalıev Facebook paraqshasynda jazdy.

«Kúdikti óz kinásin tolyq moıyndap, Taraz qalasynyń ýaqytsha ustaý ızolıatoryna qamaqqa alyndy. Ustalǵan azamat buryn sotty bolmaǵan. Atalǵan derek boıynsha Qazaqstan Respýblıkasy Qylmystyq kodeksiniń 296-baby 4-bóligimen sotqa deıingi tergeý amaldary bastaldy»,-delingen A.Orazalıev jazbasynda.

Sondaı-aq, departament basshysy óńirde esirtki quraldarynyń zańsyz aınalymyna qatysty qylmystar men quqyq buzýshylyqtardy anyqtaý boıynsha profılaktıkalyq jumystar udaıy júrgiziletinin jazǵan.