Jýalylyq qarııa bata berip, 600 myń teńge utyp aldy
TARAZ. QazAqparat – Jýalylyq qarııa Amanjol Dúráliuly Almaty oblysynda ótken «Babalar sózi – dananyń kózi» atty respýblıkalyq batagóı qarııalar baıqaýynda jeńimpaz atanǵan, - dep habarlaıdy QazAqparat tilshisi.
Bata jarysy Balpyq bıdiń 325 jyldyǵyna oraı «Babalar erligi – táýelsizdik tiregi» atty shara aıasynda uıymdastyrylǵan.
Atalǵan baıqaýǵa oblystyq kezeńniń jeńimpazy, jýalylyq Amanjol Dúráliuly aqsaqal qatysyp, jemisti óner kórsetken. Ol «Qazaqtyń qanatty sózderi» bóliminde batyr Baýyrjan Momyshulynyń patrıottyq sózderin jatqa aıtýymen erekshelenip, «Bata berý» kezeńinde de 6 mınýt múdirmesten kópshiliktiń rızashylyǵyna bólengen. Suraq-jaýap bóliminen de súrinbeı ótken.
Baıqaýdyń qazylar alqasynyń tóraǵasy, belgili telejýrnalıst Nurtileý Imanǵalıuly jerlesimizdiń barlyq kezeńge tyńǵylyqty daıyndyqpen kelgenine rızashylyǵyn bildiripti. Osylaısha Amanjol Dúráliuly respýblıkalyq batagóıler baıqaýynyń bas júldesin enshilep, 600 myń teńge aqshalaı syılyqqa ıe bolypty.
Aıta keteıik, Amanjol Dúráliuly aqsaqal búginde óńirdegi qoǵamdyq isterge belsendilikpen aralasyp keledi. El zııalysy retinde de atqaryp júrgen isteri az emes. Aýdanǵa, oblysqa syıly qarııa jas urpaq tárbıeleý jolynda úlgi-ónege kórsetip keledi.
