Jýalydan ejelgi adamnyń bas súıegi tabyldy
TARAZ. QazAqparat – Jambyl oblysy Jýaly aýdanynda arheologııalyq qazba jumystary kezinde ejelgi adamnyń bas súıegi tabyldy ,-dep habarlaıdy QazAqparat tilshisi.
Mamandar ony 2-1 ǵasyrlarǵa jatqyzyp otyr. Onyń er nemese áıel adam bolǵanyn jáne naqty jasyn ýkraınalyq ǵalymdar anyqtamaq. Ol úshin arnaıy zerthanaǵa bas súıektiń tisi jiberildi.
«Úsh metrlik tereńdikten adamnyń basy shyqty. Basqa súıekteri joq. Alǵashqy kezde dán úgetin tastar, qumyranyń synyqtary, bútin qumyralar da shyqty. Ashylyp, túgel qazylyp bitip jatsa, bul endi jalǵyz biz emes, búkil Qazaqstanǵa úlken maqtanysh bolar edi. Budan 2 myń jyl buryn ómir súrip ketken halyqtardyń turmys-tirshiligi týraly bilýge bolady»,- deıdi qazba jumystaryna qatysýshy Alǵan Álıev.
Aıta ketý kerek, kóne Býrno-Oktıabr qalashyǵyn arheologııalyq zertteý kezinde 3500-ge tarta jádiger tabylǵan. Arasynda qysh ydystardyń synyqtary, qol dıirmen, qoladan jasalǵan maı shamdar bar. Qazir arheologtar eki bólmeniń ornyn taýyp, zerttep jatyr. Onyń bireýi qaz qalpynda saqtalǵan.
«Qabyrǵalary búlinbegen. Tipti bólmeniń tóbesi de saqtalǵan. Kúmbez tárizdi. Mine qarańyz, mynaý qabyrǵa, ári qaraı kirpishter kóldeneń emes, shyrsha sııaqty qalanǵan. Tolyqtaı tazarttyq. Bólme ádeıi kómilgen. Nege deseńiz, bul jerdiń kóne turǵyndary nysandy jáı ǵana tastap ketpegen. Olar munda qaıta kelýdi kózdegen»,- deıdi arheolog Eskendir Tórebekov.
