Jýalydaǵy sanıtarlyq beketten bir táýlikte 590 kólik pen 800 adam ótken

TARAZ. QazAqparat – Jambyl oblysynyń kireberisinde koronavırýsqa baılanysty aldyn alý sharalaryn kúsheıtý maqsatynda sanıtarlyq beketter óz jumysyn bastady. Olardy ornatýdaǵy negizgi maqsat – halyqty aqparattandyrý, azamattardyń qozǵalysyn baqylaý jáne jolaýshylardyń dene qyzýyn ólsheý, dep habarlaıdy QazAqparat.

Oblys ákimi Berdibek Saparbaev Jýaly aýdanyndaǵy blok-bekettiń jumysymen tanysty. Munda kún saıyn júzdegen adam ótedi desek, onyń deni - Shymkent qalasynan kelýshiler.

Aýdandyq polıtsııanyń málimetinshe, sońǵy táýlikte munda 590 avtokólik pen 800 adam ótken. Árbir ótetin adamnyń derekteri boıynsha saýalnama toltyrylyp, al medıtsına mamandary teplovızor kómegimen olardyń dene qyzýyn ólsheıdi. Bul bekette barlyǵy 8 polıtseı men 15 medıtsına qyzmetkeri jumys isteýde.

Osyndaı profılaktıkalyq beketter Qyrǵyzstanmen shektesetin Qordaı aýdanynda, Qaraǵandy oblysymen shektesetin Moıynqum aýdanynda, Túrkistan oblysymen shektesetin Sarysý aýdanynda da qoıylǵan.

Ár pýnkte táýlik boıy kezekshilik uıymdastyrylyp, ondaǵan medıtsına, polıtsııa jáne prokýratýra qyzmetkerleri jumys isteıdi.