Jýalyda qar qursaýynda qalǵan 140 adam qutqaryldy
JÝALY. QazAqparat – Jambyl oblysy Jýaly aýdanynda aýa-raıynyń qolaısyzdyǵyna baılanysty «Almaty-Tashkent» jol ýchaskesinde bolǵan tótenshe jaǵdaı oblys ákiminiń tikeleı baqylaýynda. Bul týraly oblys ákiminiń baspasóz qyzmeti málim etti, dep habarlaıdy QazAqparat.
Oqıǵa ornynda tótenshe jaǵdaılar departamentiniń 30-ǵa jýyq qyzmetkeri jáne 6 tehnıkasy avarııalyq-qutqarý jumystaryn júrgizgen.
«26 avtokólik qar qursaýynan shyǵarylyp, 140 adam evakýatsııalandy. Onyń ishinde segizi bala. Olar jaqyn mańdaǵy Aısha bıbi aýylyndaǵy jylytý pýnkterine jetkizildi. Búginde 3 jylytý pýnkti jumys jasaýda. Onda ystyq tamaq, medıtsınalyq kómek uıymdastyrylǵan. Zardap shekkender joq. Medıtsınalyq kómekke júgingender bolmady»,-delingen baspasóz qyzmetiniń habarlamasynda.
Sondaı-aq, vedomstvo málimdemesinde aýdandaǵy shalǵaı aýyldardyń bárimen baılanys ornatylǵandyǵy jazylǵan. Qum tóseý, baqylaý boıynsha oblystyq TJD, «Qazavtojol» mekemesi jáne jol patrýldik polıtsııa qyzmetkerleri táýlik boıy jumys jasaýda. Qazirgi tańda atalǵan baǵyt boıynsha «Qaýyrt jeli» ashylyp, jedel shtab jumysy uıymdastyrylǵan.
Mamandar ázirge júrgizýshiler men turǵyndardy alys jolǵa shyqpaýǵa shaqyrýda.
