Jýalyda Baýyrjan Momyshulynyń bıýsti ashylyp, stela boı kóterdi
TARAZ. QazAqparat – Keńes Odaǵynyń batyry, dańqty qolbasshy Baýyrjan Momyshulynyń 110 jyldyǵyna oraı týǵan óńiri Jambyl oblysy Jýaly aýdanynda keńinen atalyp ótti, dep habarlaıdy QazAqparat tilshisi.
Tulǵanyń mereıtoıy óziniń týyp-ósken Jýaly jerinde atalyp ótti. Mereıtoı sharalary B.Momyshuly aýylyndaǵy batyr eskertkishine gúl shoǵyn qoıyp, rýhyna taǵzym etýden bastaldy.
Budan soń Baýyrjan Momyshulynyń kindik qany tamǵan tamǵan Myńbulaq óńirindegi Momysh bulaǵynyń basynda batyrdyń árýaǵyna arnap quran oqyldy. Demeýshilerdiń kómegimen bulaq basyna baratyn bir shaqyrymǵa jýyq jolǵa shaǵaltas tóselip tegisteldi. Bulaq basy qorshalyp, sán aǵashtary otyrǵyzylǵan. Arnaıy boı kótergen stelanyń ashylý saltany ótti.
Sharaǵa QR Sybaılas jemqorlyqqa qarsy agenttiginiń Jambyl oblysy boıynsha departamentiniń basshysy Ádilhan Áshirbaev, aýdan basshylary men ardagerler uıymdary men jurtshylyq ókilderi qatysty.
«Jýaly» meshitiniń ımamy Seıitqazy qajy Medetbek Quran aıattaryn oqydy. Aýdannyń qadirmendi aqsaqaly, Momysh bulaǵynyń kútimge alynyp, kórkeıýine eńbek sińirgen Amanjol qajy Dúráliuly kópshilikke aq batasyn berdi.
Sondaı-aq, Jýaly aýdan aýmaǵynda ornalasqan QR Ulttyq qaýipsizdik komıteti Shekara qyzmetiniń Jambyl oblystyq departamentine qarasty Baýyrjan Momyshuly atyndaǵy shekara bólimshesinde batyr bıýstiniń ashylýy saltanaty ótti.
Shekara bólimshesiniń jeke quramy merekelik sapqa turǵyzylyp, Memlekettik Ánuran shyrqaldy.
Jambyl oblysy ákiminiń orynbasary Talǵat Mamaev, Jýaly aýdanynyń ákimi Narbaı Ergebekov, Shekara qyzmeti Jambyl oblystyq departamentiniń basqarma bastyǵy Qanatbek Tynybekov shekarashylar men jıylǵan jurtshylyqty osynaý mańyzy tereń qýanyshty oqıǵamen quttyqtaı otyryp, izgi lebizin bildirdi.
Batyr bıýstiniń lentasyn Talǵat Mamaev pen aýdandyq ardagerler keńesiniń tóraǵasy Estemes Amanbekov kesti. Tulǵanyń mereıtoıyna oraı aýdanda ózge de is-sharalar uıymdastyryldy.
