Jýaly aýdanyndaǵy medqyzmetker shaǵymy boıynsha tekserý: bas dáriger men orynbasary jumystan bosatylady

TARAZ. QazAqparat – Áleýmettik jelilerde jarııalanǵan Jýaly aýdandyq ortalyq aýrýhanasynyń medıtsına qyzmetkeri Farıda Janbatyrovanyń ótinishi boıynsha ishki tergeý júrgizý úshin Jambyl oblysy ákiminiń tapsyrmasymen arnaıy komıssııa jiberildi, dep habarlaıdy QazAqparat tilshisi.

Oblys ákimi baspasóz qyzmetiniń habarlaýynsha, komıssııa quramyna densaýlyq saqtaý basqarmasynyń, oblys ákimi apparatynyń qyzmetkerleri jáne qoǵam ókilderi engen. Komıssııa músheleri medıtsına qyzmetkerlerimen, medıtsınalyq mekeme ujymymen jeke kezdesýler ótkizip, sondaı-aq anonımdi saýalnama júrgizdi.

«Komıssııanyń aldyna aıtylǵan barlyq faktilerdi obektıvti jáne beıtarap túrde anyqtaý, emdeý mekemesi qyzmetkerleriniń quqyqtarynyń buzylýyna jol bermeý boıynsha naqty sharalar qabyldaý mindeti qoıyldy. Qyzmettik tekseristiń aldyn ala nátıjeleri boıynsha F.Janbatyrovanyń keıbir dálelderi rastaldy. Ujymda jaǵymsyz moraldyq-psıhologııalyq jaǵdaı qalyptasqan desek, oǵan eń aldymen emdeý mekemesi basshylyǵynyń óziniń kásibı mindetterine jaýapsyz qaraýy áser etken»,-delingen habarlamada.

Jiberilgen buzýshylyqtar úshin OAA bas dárigeri B. Alpysbaı, bas dárigerdiń ekonomıka jónindegi orynbasary A.Baıtoreev qyzmetinen bosatylady. Sondaı-aq, Jýaly aýdanynyń ákimi N. Erkebekovke sógis jarııalanady.

Al, oblystyq densaýlyq saqtaý basqarmasynyń basshysynyń jaýapkershiligi karantın aıaqtalǵan soń qaralmaq.

Іstiń barlyq materıaldary quqyq qorǵaý organdaryna joldandy.