Jýaly aýdandyq aýrýhanasynyń bas dárigeri qyzmetinen bosatyldy

TARAZ. QazAqparat – Jambyl oblysy Jýaly aýdandyq ortalyq aýrýhanasynyń bas dárigeri Batıhan Alpysbaı qyzmetinen bosatyldy, - dep habarlaıdy QazAqparat tilshisi oblys ákimdiginiń resmı saıtyna silteme jasap.

Esterińizge sala keteıik, aǵymdaǵy jyldyń shilde aıynda aýdandyq aýrýhananyń qyzmetkeri F. Janbatyrovanyń áleýmettik jelige jarııalaǵan aryzynan soń aýdanǵa qyzmettik tekseris júrgizý úshin arnaıy komıssııa attanǵan bolatyn.

«Qyzmettik tekserý nátıjesinde, F. Janbatyrovanyń keltirgen keı derekteri rastaldy. Ujym ishinde jaısyz moraldyq-psıhologııalyq jaǵdaı qalyptasqany anyqtaldy. Oǵan, birinshi kezekte, emdeý mekemesi ákimshiliginiń kásiptik mindetterine jaýapsyz qaraǵany áser etken. Barlyq materıaldar quqyq qorǵaý organdaryna jiberildi.

Tártip buzǵany úshin bas dárigerdiń ekonomıka jónindegi orynbasary A. Baıtóreev qyzmetinen bosatyldy. Óz kezeginde bas dáriger B. Alpysbaı densaýlyq jaǵdaıyna baılanysty demalysqa shyǵyp ketken. Sondyqtan eńbek zańnamasyna sáıkes, ony qyzmetinen bosatý múmkin bolmady»,-delingen oblys ákiminiń baspasóz qyzmetiniń habarlamasynda.

Sondaı-aq, habarlamada osy jyldyń 5 qazanynda B. Alpysbaı jumysqa shyǵyp, 20 qazan kúni taǵy bir ret ýaqytsha jaramsyzdyq paraǵyn ashtyrǵandyǵy aıtylǵan. Bul oraıda densaýlyq saqtaý basqarmasymen tekseris júrgizilip, nátıjesinde emdeý mekemesi basshysynyń demalysqa negizsiz shyqqany anyqtalypty.

Jambyl oblystyq densaýlyq saqtaý basqarmasy basshysynyń mindetin atqarýshynyń 2020 jyldyń 26 qazanyndaǵy buıryǵyna sáıkes, B. Alpysbaı tártiptik teris qylyq jasaǵany úshin qyzmetinen bosatyldy.