JTS boıynsha jańa tártip: bazalyq salyq shegerimi endi kelesi aıǵa aýystyrylmaıdy
ASTANA.KAZINFORM — Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen jańa Salyq Kodeksin engizý jobalyq keńsesiniń 20-shy otyrysy ótkizildi. Bul týraly Úkimettiń baspasóz qyzmeti málim etti.
Otyrystyń negizgi taqyryby — jeke tabys salyǵy (JTS) boıynsha bazalyq jáne áleýmettik salyq shegerimderin qoldanýdyń praktıkalyq máseleleri.
— Jańa Salyq kodeksiniń negizgi jańalyǵynyń biri — salyq shegerimderi júıesin jetildirý jáne azamattarǵa salyq júktemesin azaıtý. Atap aıtqanda, aı saıyn 30 AEK mólsherinde, biraq kúntizbelik jylda 360 AEK-ten aspaıtyn bazalyq salyq shegerimi engizildi. Ol jeke tulǵanyń salyq salynatyn kirisin azaıtady, demek, tóleýge jatatyn JTS somasyn azaıtady. Budan basqa, mindetti zeınetaqy jarnalary, áleýmettik aýdarymdar jáne mindetti áleýmettik medıtsınalyq saqtandyrý jarnalary boıynsha shegerimder saqtaldy, — delingen habarlamada.
Otyrys barysynda qyzmetkerdiń tabys mólsheri shegerim somasynan tómen bolǵan jaǵdaılarda bazalyq salyq shegerimin qoldaný máselesi qaraldy. Buryn qoldanysta bolǵan Salyq kodeksi kúntizbelik jyl sheginde salyq shegerimderiniń asyp ketýin kelesi aılarǵa aýystyrýdy kózdeıtin. Kodekstiń jańa redaktsııasynda mundaı norma joq.
«Atameken» ulttyq kásipkerler palatasynyń ókilderi bazalyq shegerimniń paıdalanylmaǵan bóligin aýystyrýdyń buryn qoldanysta bolǵan tetigin saqtaýdy usyndy. Sonymen birge, memlekettik kirister komıtetiniń ókilderi jańa normanyń ıdeologııasy azamattardy, eń aldymen tabysy tómen qyzmetkerlerdi aı saıynǵy qoldaý sharasy retinde bazalyq salyq shegerimin berý bolyp tabylatynyn túsindirdi. Sondyqtan bazalyq salyq shegerimi árbir kúntizbelik aı úshin jeke qoldanylady jáne paıdalanylmaǵan somany keıingi salyq kezeńderine aýystyrýdy kózdemeıdi.
Talqylaý qorytyndysy boıynsha Memlekettik kirister komıteti kelesi kúntizbelik kezeńderge bazalyq salyq shegeriminiń asyp ketýine jol berilmeıtinin rastaıtyn resmı túsiniktemeler daıyndaıdy dep sheshildi.
— Otyrysqa qatysýshylar JTS boıynsha áleýmettik salyq shegerimin qoldaný máselelerine erekshe nazar aýdardy. Salyq kodeksinde I jáne II toptaǵy múgedek adamdar úshin 5 000 AEK, sondaı-aq III toptaǵy múgedek adamdar, múgedek balalardyń ata-analary, asyrap alýshylar, asyrap alýshylar men qamqorshylar úshin 882 AEK mólsherinde áleýmettik salyq shegerimi kózdelgen, — dep túsindirdi Úkimetten.
Otyrysqa qatysýshylar Salyq kodeksiniń qoldanystaǵy redaktsııasy jumys berýshiniń aýysýy kezinde áleýmettik salyq shegeriminiń paıdalanylmaǵan somasyn esepke alý múmkindigin kózdeıtinin atap ótti. Sonymen qatar Kodekste jeke tulǵa bir mezgilde birneshe jumys berýshilerde jumys isteıtin jaǵdaılarda mundaı shegerimdi qoldaný tártibin tikeleı retteý qamtylmaǵan.
Talqylaý barysynda naqty erejelerdiń bolmaýy normany ekiushty qoldaný jáne ony josyqsyz paıdalaný táýekelderin týdyrýy múmkin ekendigi atap ótildi. Osyǵan baılanysty Qarjy mınıstrligi men Memlekettik kirister komıtetine salyqtyq jeńildiktiń áleýmettik baǵytyn saqtaýdy qamtamasyz etetin jáne ony qoldaný kezinde teris paıdalaný múmkindigin boldyrmaıtyn biryńǵaı tásildi ázirleý tapsyryldy.
Aıta keteıik, buǵan deıin ekonomıkanyń ósýi, kredıttik naryqtyń damýy, bıznesti qoldaý jáne ekonomıkanyń naqty sektoryn yntalandyrý Úkimet, Ulttyq Bank, Qarjy naryǵyn retteý jáne damytý agenttigi, «Atameken» ulttyq kásipkerler palatasy jáne sarapshylar qoǵamdastyǵy ókilderiniń birlesken talqylaý taqyrybynyń negizine aınaldy.
