Jiti ishek ınfektsııasyna shaldyqqandardyń 71%-y — balalar
ASTANA. KAZINFORM — Bıyl Qazaqstanda tirkelgen jiti ishek ınfektsııasy jaǵdaılarynyń 71 paıyzdan astamy 14 jasqa deıingi balalardyń úlesine tıesili.
Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málimdedi.
Onyń aıtýynsha, jiti ishek ınfektsııalary jaz mezgilinde jıi kezdesetin juqpaly aýrýlardyń biri. Aptap ystyqta ınfektsııa qozdyrǵyshtary jyldam kóbeıetindikten, jeke bas gıgıenasy saqtalmasa, taǵam durys saqtalmasa nemese sapasyz sý paıdalanylsa, aýrý juqtyrý qaýpi artady.
— Jyl basynan beri elimizde jiti ishek ınfektsııasynyń 7,5 myńnan astam jaǵdaıy tirkeldi. Bul ótken jyldyń osy kezeńimen salystyrǵanda 12 paıyzǵa tómen. Naýqastardyń 71 paıyzdan astamy — 14 jasqa deıingi balalar. Onyń ishinde 18 paıyzy — bir jasqa tolmaǵan sábıler. Bul balalardy kútý kezinde jáne taǵam ázirleý barysynda sanıtarııalyq-gıgıenalyq talaptardy qatań saqtaýdyń mańyzdy ekenin kórsetedi, — dedi Sarhat Beısenova.
Spıkerdiń sózinshe, árbir tirkelgen jaǵdaı boıynsha ınfektsııanyń odan ári taralýyna jol bermeýge baǵyttalǵan indetke qarsy sharalar júrgiziledi.
Epıdemıologııalyq zertteý barysynda naýqastarmen baılanysta bolǵan 3 167 adam tekserildi. Infektsııanyń taralýyna áser etken yqtımal sebepterdi anyqtaý úshin 1 311 taǵam synamasy men 903 sý synamasy zertteldi.
Budan bólek, sanıtarııalyq baqylaý aıasynda ishek taıaqshalary tobyna 4 223 shaıyndy jáne patogendi mıkrofloraǵa 7 710 shaıyndy zerthanalyq tekserýden ótti.
— Bul jumystar qaýip faktorlaryn der kezinde anyqtaýǵa, ınfektsııanyń jappaı taralýynyń aldyn alýǵa jáne halyqtyń sanıtarııalyq-epıdemıologııalyq salamattylyǵyn qamtamasyz etýge múmkindik beredi, — dedi Sarhat Beısenova.
Eske salaıyq, buǵan deıin Astanada bıylǵy alǵashqy bes aıda jiti ishek ınfektsııalarymen syrqattaný kórsetkishi ótken jyldyń sáıkes kezeńimen salystyrǵanda 10 paıyzǵa tómendegenin jazǵan edik.
