JSN berý merzimi 2012 jyldyń qańtaryna deıin uzartylady
ASTANA. Maýsymnyń 17-si. QazAqparat /Qanat Mámetqazyuly/ ‑ JSN berý merzimi 2012 jyldyń qańtaryna deıin uzartylady. Osyǵan oraı, búgin QR Parlamenti Senatynyń jalpy otyrysynda palata depýtattary «QR keıbir zańnamalyq aktilerine ıdentıfıkatsııalyq nómirler máseleleri boıynsha ózgerister men tolyqtyrýlar engizý týraly» zańyn qabyldady,
dep habarlaıdy QazAqparat.
«JSN engizilýine, ony berý merziminiń aıaqtalýyna baılanysty jurtshylyq arasynda birshama qobaljýlar oryn alǵany belgili. Bundaǵy basty másele «Identıfıkatsııalyq nómirler týraly» zań 2007 jyly kúshine engen bolatyn, qoldanystaǵy osy zańda JSN berý merzimi 2010 jylǵy tamyzdyń 13-inde aıaqtalady dep jazylǵan. Alaıda, qazirgi jaǵdaı oǵan kereǵar bolýda. Osyǵan oraı, depýtattar osy zań jobasynda JSN engizý merzimin 2012 jylǵy qańtardyń 1-ine deıin uzartý týraly norma usynyp otyr», dedi zań jobasyna bastamashylyq jasaǵan depýtattyń biri Iraq Elekeev.
Budan buryn habarlanǵandaı, jeke kýáliginde jáne tólqujatynda Jeke sáıkestendirý nómiri (JSN) joq azamattar bıylǵy jylǵy tamyzdyń 13-ine deıin ádilet organdaryna nemese Halyqqa qyzmet kórsetý ortalyqtaryna baryp, qujattaryn aýystyrýlary qajet bolatyn. Endi Parlament qabyldaǵan zań atalǵan merzimdi 2012 jyldyń qańtaryna deıin uzartyp otyr.
