JSN almaǵan azamattardyń sany 700 myń shamasynda bolyp otyr - Á. Amanbaev
ASTANA. Mamyrdyń 25-i. QazAqparat /Qanat Mámetqazyuly/ - Qazaqstanda Jeke sáıkestendirý nómirin ıelenbegen azamattardyń sany 700 myń shamasynda bolyp otyr. Búgin «QR keıbir zańnamalyq aktilerine ıdentıfıkatsııalyq nómirler máseleleri boıynsha ózgerister men tolyqtyrýlar engizý týraly»
zań jobasyn talqylaý barysynda QR Ádilet mınıstrligi Tirkeý qyzmeti jáne quqyqtyq kómek kórsetý komıtetiniń tóraǵasy Ámirhan Amanbaev osylaı málim etti, dep habarlaıdy QazAqparat.
«Qazirgi tańda respýblıka boıynsha Jeke sáıkestendirý nómirin (JSN) almaǵan azamattardyń sany 700 myń shamasynda bolyp otyr. Aǵymdaǵy jylǵy qańtar aıynda bulardyń sany shamamen 1 mıllıon 500 myń adam bolatyn. Aldaǵy ýaqytta qujattardy almastyrýǵa qatysty merzim uzartylatyn bolsa, halyq arasynda sonshalyqty ábigerge túsetindeı jaǵdaı bolmaıdy dep sanaımyz. Biz JSN-i joq jeke kýálikterdi aýystyrý týraly úsh jyl boıy aqparattandyryp kelemiz. Biraq, sońǵy úsh aıda ǵana jurtshylyq tarapynan erekshe belsendilik tanylyp, bunyń sońy problemaǵa da aınalyp otyr», dedi Á. Amanbaev.
Onyń aıtýynsha, respýblıkamyzda Bıznesti sáıkestendirý nómirin (BSN) shamamen 200 myńǵa tarta zańdy tulǵa almaǵan.
