JShS-ler úshin jarǵylyq qordyń eń tómengi mólsheri qaıta qaralýy tıis - M. Nárikbaev
ASTANA. 3 maýsym. QazAqparat /Qanat Mámetqazyuly/ - Jaýapkershiligi shekteýli seriktestikter úshin jarǵylyq qordyń eń tómengi mólsheri qaıta qaralýy tıis. Búgin QR Parlamenti Májilisiniń janyndaǵy Qoǵamdyq
Palatanyń otyrysynda «Qazaqstan Respýblıkasynyń keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasyn talqylaý barysynda Palata tóraǵasynyń orynbasary Maqsut Nárikbaev osylaı málim etti.
«Árıne, zańdy tulǵany túrmege jaba almaıtynymyz anyq. Bunda áńgime basqada. Ádette fırmalar, transulttyq kompanııalar qandaı da bir zańsyzdyqqa qatysty bir qyzmetkerin nemese tipti dırektoryn túrmege qamatýmen isti tyndyrady, al fırmanyń shekkizgen mıllıardtaǵan shyǵyndarynyń orny ortaıyp, sol qalpynda qalyp jatady. Sondyqtan da, bul baǵytta kompanııalarǵa, ıaǵnı zańdy tulǵalarǵa qarsy sanktsııalar, shyǵyndy ótetý úshin salynatyn mıllıardtaǵan aıyppuldar týraly máseleniń qamtylǵany oryndy», - dedi M. Nárikbaev. Bul rette tóraǵa orynbasary zańdy tulǵalardyń qylmystyq jaýapkershiligi ınstıtýtyn engize otyryp, fırmalardyń eń tómengi jarǵylyq kapıtalyn arttyrý máselesin de zań júzinde sheshý kerektigin alǵa tartady. «Bul eń quryǵynda japa shegýshiniń shyǵynyn ishinara bolsa da óteý úshin qajet. Osyǵan baılanysty jaýapkershiligi shekteýli seriktestikter úshin jarǵylyq qordyń eń tómengi mólsherin qaıta qarastyrý kerek dep bilemin. Qylmystyq jolmen pul tapqysy keletin tulǵalar op-ońaı jolmen, eshqandaı aktıvke ıe bolmaı-aq, jarǵylyq kapıtaly mızerli somamen fırma ashyp, mıllardtaǵan aqsha aınalymyna qol jetkizýge múmkindik alady», - dedi M. Nárikbaev.
