JShS basshysy Şýchınsk turǵyndarynyń 5 mıllıon teńgesin kazınoda uttyryp jibergen
KÓKShETAÝ. QazAqparat - Şýchınsk qalasy turǵyndarynyń úılerine kúrdeli jóndeý júrgizý úshin aýdarylǵan 8 mıllıon teńgeden astam aqshany jymqyryp, bul somanyń birazyn kazınoda uttyryp jibergen seriktestiń burynǵy dırektory 2,6 jylǵa bas bostandyǵynan aıyryldy, dep habarlaıdy QazAqparat tilshisi Býrabaı aýdandyq sotynyń úkimine silteme jasap.
Sotta belgili bolǵandaı, 2012 jyly «Turǵyn úı-kommýnaldyq sharýashylyǵyn jańǵyrtý» memlekettik baǵdarlamasy sheńberinde «Esil ÁKK» UQ» AQ arqyly Şýchınsk qalasyndaǵy birqatar turǵyn úılerge kúrdeli jóndeý júrgizý úshin 68 815 662 teńge kóleminde qarjy bólingen. 2013 jyly atalmysh úılerdiń turǵyndarynan nesıe aqshasyn qaıtaryp, keıin bıýdjetke aýdarý úshin seriktestik quryldy.
2016 jyly JShS jańa dırektory taǵaıyndalyp, turǵyndardan jınalǵan aqshasy bar banktik esepshot tapsyryldy. Alaıda, sot úkiminde 2016 jyly sáýir jáne maýsym aılarynda atalmysh dırektordyń esepshottan 4 934 000 teńge kóleminde aqshany alyp, ony kazınoda oıynǵa jumsaǵany anyqtaldy. Sonymen qatar, ol turǵyndardan qaıtarym retinde jınalǵan aqshany kassırden alyp, keıin banktiń esepshotyna qaıtarmaǵan, kerisinshe jeke basynyń paıdasyna jumsaǵan. Osylaısha, ol osyndaı jolmen 2016 jyldyń sáýiri men 2018 jyldyń naýryz aıy aralyǵynda 3 410 507 teńge aqsha alǵan.
Nátıjesinde dırektordyń jymqyrǵan aqshasy 8 344 507 teńgeni qurady. Sotta aıyptalýshy kinásin moıyndap, ókinetin aıtty. Oǵan qosa, eks-dırektor ózine 80 000 teńge aılyq belgilengenmen, ol tólenbegenin de jetkizdi. Sondyqtan, ol aqshany esepshottan alyp otyrǵan. Keıin qaıtarý qajettigin túsingen ol álgi aqshany kazınoda oıynǵa salyp, eselep qaıtaryp almaq bolǵan. Alaıda, ár barǵan saıyn utyla bergen ol bir jarym aıdyń ishinde 5 mıllıon teńge aqshadan aıyrylǵan.
Sot eks-dırektordy QR QK 189-babynyń 1 jáne 2 bóligi boıynsha kánili dep tanyp, 2,6 jylǵa bas bostandyǵynan aıyrý jazasyn taǵaıyndady. Sonymen qatar, er adam ómir boıyna memlekettik qyzmette jumys isteý quqyǵynan aıyryldy. Oǵan qosa, ótelmegen 3 344 507 teńge materıaldyq shyǵyndy óteýge mindetteldi.
Sot úkimi kúshine áli engen joq.
