JSDP Quryltaıǵa kiretin 8 depýtattyń esimin atady
ASTANA. KAZINFORM — Jalpyulttyq sotsıal-demokratııalyq partııa (JSDP) Quryltaıdyń jańa quramynda jumys isteıtin segiz ókiliniń tizimin jarııalady.
Partııanyń baspasóz qyzmetiniń habarlaýynsha, JSDP Saıası keńesi Prezıdıýmynyń otyrysynda partııa atynan Quryltaıǵa kiretin kandıdattardyń tizimi biraýyzdan qoldaý tapty.
JSDP atynan Quryltaı quramyna segiz kandıdat kiredi:
1. Ashat Raqymjanov — JSDP tóraǵasy, QR Parlamenti Májilisiniń VIII shaqyrylym depýtaty, Sotsıalıstik ınternatsıonal halyqaralyq uıymynyń vıtse-prezıdenti;
2. Maqsut Nasıbulov — JSDP Ortalyq apparatynyń basshysy;
3. Nuraınash Qamalova — JSDP Atyraý oblystyq fılıalynyń tóraǵasy;
4. Larısa Lı — «PANA» jobasynyń jetekshisi;
5. Aslan Qulmaǵambetov — JSDP Astana qalalyq fılıalynyń ekologııalyq saıasat máseleleri jónindegi sarapshysy;
6. Arman Aqylbaı — QR Ádilet mınıstrligi Personalmen jumys departamentiniń dırektory;
7. Naýryz Saılaýbaı — JSDP Jastar qanatynyń jetekshisi, QR Parlamenti Májilisiniń VIII shaqyrylym depýtaty;
8. Ajar Saǵandyqova — QR Parlamenti Májilisiniń VIII shaqyrylym depýtaty, JSDP Áıelder qanatynyń jetekshisi.
— JSDP óz saılaýshylaryna bildirgen senimi úshin alǵys aıtady. Partııa Qazaqstan azamattarynyń múddelerin Quryltaıda odan ári qorǵaýǵa jáne áleýmettik-demokratııalyq baǵyttaǵy bastamalaryn iske asyrý boıynsha júıeli jumys júrgizýge daıyn, — delingen baspasóz habarlamasynda.
Aıta keteıik, buǵan deıin Memleket basshysy Qazaqstan Respýblıkasy Quryltaıynyń birinshi shaqyrylymynyń alǵashqy sessııasyn shaqyrý týraly Jarlyqqa qol qoıǵan edi.
Quryltaıdyń alǵashqy sessııasy 2026 jylǵy 28 tamyzda ótedi.
Eske salaıyq, 23 tamyzda ótken Quryltaı depýtattaryn saılaý qorytyndysy boıynsha bes saıası partııa parlament quramyna ótti.
Qazaqstan Halyq partııasy men «Baıtaq» partııasy qajetti mejeden óte alǵan joq.
