JSDP Konstıtýtsııa jobasyn jalpyhalyqtyq referendýmǵa shyǵarýdy qoldady

ASTANA. KAZINFORM – Jańa Konstıtýtsııa jobasy memlekettik saıasattyń áleýmettik baǵdarlyǵyn kúsheıtedi. Bul týraly Májilis depýtaty, Jalpyulttyq sotsıal-demokratııalyq partııasynyń tóraǵasy Ashat Rahymjanov aıtty.

- Negizgi zańnyń jańa nusqasy memlekettiń áleýmettik ólshemderin kúsheıtedi. Onda adam negizgi qundylyq retinde qarastyrylady. Zań men sot aldyndaǵy teńdiktiń bekitilýi, quqyq pen bostandyq kepiliniń keńeıtilýi, olardy qorǵaý tetikteriniń kúsheıtilýi qoǵamnyń ádil ári laıyqty suranysyna saı keledi. Sotsıal-demokrattar úshin bul – kez kelgen konstıtýtsııalyq ózgerister men saıası reformalardy baǵalaýdyń negizgi ólshemsharty. Qoǵamdyq birlestikter qyzmetiniń erkindigin bekitý jáne azamattardyń qoǵamdyq ómirge aralasýyn keńeıtý aıryqsha mánge ıe,- dedi ol Konstıtýtsııalyq reformalar jónindegi komıssııanyń 12-otyrysynda.

Onyń paıymynsha, bul kásipodaqtar, qoǵamdyq uıymdar men bastamashyl toptar eńbek adamdarynyń, jastardyń, áleýmettik álsiz toptardyń múddelerin erkin bildirýge múmkindik beretin shynaıy azamattyq qoǵamdyq damytý úshin jaǵdaı jasaıdy.

- Konstıtýtsııaly komıssııa jumysynyń sıpatyn jeke atap ótkim keledi. Jobany talqylaý mazmundy, túrli ustanymdar men dáleldermen boldy. Bul teńgerimdi ári kelisimdi qujat daıyndaýǵa múmkindik berdi. Mundaı jumys jan-jaqty qoldaýǵa laıyq. Menińshe, Negizgi zańnyń usynylǵan jobasy azamattardyń basty úmitin pash etedi, áleýmettik ádildik pen demokratııanyń bazalyq qaǵdıattaryna saı keledi jáne de jalpyhalyqtyq referendýmǵa shyǵarýǵa daıyn, - dedi Ashat Rahymjanov.

Osyǵan deıin Májilis depýtaty Aıdos Sarym Konstıtýtsııa jobasyn referendýmǵa shyǵarý úshin Prezıdent qaraýyna usynýǵa bolatyny týraly aıtty.