JRVI órship tur: Qaraǵandy oblysynda 30-ǵa jýyq synyp qashyqtan oqıtyn boldy
QARAǴANDY. KAZINFORM — Qaraǵandy oblysynda maýsymdyq respıratorlyq ınfektsııalar sanynyń artýyna baılanysty sanıtarlyq shekteýler kúsheıtilip jatyr. Birqatar mektep synyptary onlaın oqytý formatyna kóshirildi, al dárigerler tumaý men basqa da vırýstardyń belsendiligin tirkeýdi jalǵastyryp otyr.
Qazaqstanda 2025–2026 jyldardaǵy epıdemıologııalyq maýsym kezeńinde tumaý, JRVI jáne COVID-19-ǵa qarsy profılaktıkalyq jáne epıdemııaǵa qarsy sharalar kúsheıtilgen. Olar 2025 jylǵy 22 tamyzda shyqqan Bas memlekettik sanıtarııalyq dárigerdiń qaýlysymen bekitilgen.
Qujatqa sáıkes 15 qyrkúıekten bastap tumaýǵa qarsy vaktsınatsııa júrgizilýde, medıtsınalyq uıymdardyń kireberisterinde súzgiler ornatylǵan, personalǵa maska taǵý mindettelgen. Dárigerdi úıge shaqyrǵanda júkti áıelder men bir jasqa deıingi balalarǵa basymdyq beriledi. Balabaqshalarda kún saıyn tańerteńgi fıltr jasalady, JRVI nemese tumaý belgileri bar balalar toptarǵa qabyldanbaıdy.
Mektepterdegi sharalar epıdemıologııalyq jaǵdaıǵa qaraı qatańdatylady. Inkýbatsııalyq kezeń ishinde bir synypta oqýshylardyń 20–30%-y aýyryp tirkelgen jaǵdaıda kabınet júıesin ýaqytsha toqtatý, jańa balalardy qabyldaýdy shekteý jáne qoljetimdi jerlerge sanıtaızerler ornatý usynylady.
— Eger synyptaǵy naýqastardyń úlesi 30% jáne odan assa, bilim alýshylar onlaın formatqa aýystyrylady. Qazirgi tańda oblystaǵy alty mekteptiń 29 synyby qashyqtan oqyp jatyr, — dep habarlady Qaraǵandy oblysynyń sanıtarııalyq-epıdemıologııalyq baqylaý departamentinde.
Aıta keteıik, sanıtarııalyq-epıdemıologııalyq qyzmettiń dereginshe, 1 qazan men 20 qarasha aralyǵynda óńirde 75 859 JRVI jaǵdaıy tirkelgen, onyń 57%-yn 14 jasqa deıingi balalar. Maýsymdyq A (H3N2) tumaýynyń 61 jaǵdaıy zerthanalyq turǵyda rastaldy. Bul vırýs ádette sýyq maýsymda taralatyn shtamm. Naýqastardyń 80%-y — balalar, olardyń eshqaısysy vaktsına almaǵan.
Atalǵan vırýs jańa shtammdarǵa jatpaıdy: onyń sımptomdary klassıkalyq tumaýǵa tán — dene qyzýynyń kúrt kóterilýi, bas jáne bulshyq ettiń aýyrýy, qaltyraý men jalpy álsizdik.
Sonymen qatar, óńirde basqa da respıratorlyq vırýstardyń belsendiligi anyqtalyp otyr. Grıppozdy emes ınfektsııalarǵa zerttelgen 492 úlginiń 44%-y oń nátıje bergen. Eń kóp taralǵandary — rınovırýs (44%), paragrıpp (25%), bokovırýs (12%), adenovırýs (9,5%), RS-vırýs (1,3%) jáne ózge patogender.