Jarqanattan juǵatyn jańa koronavırýs týraly resmı aqparat joq — DSM
ASTANA. KAZINFORM — Densaýlyq saqtaý mınıstrligi JRVI men tumaýǵa qarsy profılaktıka sharalaryn saqtaýdy usyndy.
— Aǵymdaǵy epıdemıologııalyq maýsymnyń basynan bastap respýblıkada JRVI-diń 3,1 mln jaǵdaıy tirkeldi, bul — ótken maýsymnyń uqsas kezeńine qaraǵanda 20%-ǵa az. Osy epıdemıologııalyq maýsymda zerthanalyq rastalǵan tumaýdyń 2 370 jaǵdaıy tirkeldi, bul ótken epıdemıologııalyq maýsymnyń deńgeıine sáıkes keledi. Tumaýǵa qarsy 2,3 mln astam adam (11,6%) egildi. DDU usynysy — 10%, — delingen vedomstvo habarlamasynda.
Mınıstrlik aýrýdyń aldyn alý úshin kelesi profılaktıka sharalaryn saqtaýdy usynady:
- adamdar kóp jınalatyn oryndarǵa, ásirese jabyq úı-jaılarǵa barýdy shekteý;
- úı-jaılardy únemi jeldetý;
- qoldy tazalaý úshin antıseptıkterdi nemese dezınfektsııalyq maılyqtardy paıdalaný;
- naýqas adamdarmen baılanysty shekteý, olardyń oqshaýlanýyn qamtamasyz etý.
— Koronavırýstyq ınfektsııa boıynsha eldegi jaǵdaı da turaqty. Jyl basynan beri elde KVI-diń 116 jaǵdaıy tirkeldi, ótken jyldyń sáıkes kezeńimen salystyrǵanda syrqattanýshylyq 8 esege tómendedi. Ólim jaǵdaılary joq. Sońǵy monıtorıng derekteri boıynsha omıkron kishi nusqasynyń aınalymy anyqtalǵan, — dep habarlady mınıstrlikten.
Keıbir sheteldik buqaralyq aqparat quraldarynda qytaılyq ǵalymdardyń jarqanattarda (HKU5) jańa koronavırýs tapqany týraly aqparat paıda boldy, bul janýardan adamǵa juǵý qaýpin týdyrady. Alaıda Dúnıejúzilik densaýlyq saqtaý uıymynyń, AQSh aýrýlardy baqylaý jáne aldyn alý ortalyǵynyń jáne Qytaıdyń aýrýlardy baqylaý jáne profılaktıka ortalyǵynyń resmı saıttarynda bul vırýs týraly resmı aqparat joq.
Buǵan deıin habarlaǵanymyzdaı, Almatyda týberkýlezben aýyratyndar sany 3 ese tómendedi.