JRVI-men syrqattanýdyń artýy úılerge jylý berýmen baılanysty emes – Almaty ákimi

ALMATY. QazAqparat – Almaty qalasy Bostandyq aýdanynyń turǵyndarymen kezdesýde shahar basshysy Erbolat Dosaevqa úılerge jylý nelikten kesh berilgeni týraly suraq qoıyldy. Olardyń paıymynsha, osy sebepti qalada tumaýǵa shaldyqqandar sany artqan, dep habarlaıdy QazAqparat tilshisi.

Erbolat Dosaevtyń aıtýynsha, JRVI-men óz balalary da, eresekter, tipti, jumysqa kelmeı júrgen qol astyndaǵy qyzmetkerleri de syrqattanyp jatyr. Biraq onyń bári úılerge jylý berýmen baılanysty emes.

«Ótken aptada dalada aýa temperatýrasy +20, 22 gradýs bolǵanyn jaqsy bilesizder. Biz tıisinshe jylýdy 17 qazan kúni berdik. Sebebi aýa temperatýrasy tómendeı bastady. Qazir úıde jylýdy sezinip otyrsyzdar. Baıqasańyzdar, adamdar JRVI-men tek Almatyda aýyryp jatqan joq, eger olaı bolǵanda, óz kinámdi moıyndar edim. Biraq, bizde 2 mıllıonnan astam halyq bar. JRVI-men syrqattanýshylyq jaǵdaıy 85 myńdy qurap otyr. Bul kúz mezgilindegi qalypty qubylys. Tehnıkalyq reglamentke sáıkes, kóptegen jyldar ishinde biz jylýǵa ýaqytynda qosyldyq dep sanaımyn», - dedi Erbolat Dosaev.

Eske salaıyq, Almatyda bir jarym aıda 30 myńnan astam turǵyn JRVI-ge shaldyqty.