JRVI men gonkong tumaýy: Almatyda jedel járdem shaqyratyndar azaıa bastady
ALMATY. KAZINFORM – Almatyda tumaý men JRVI boıynsha maýsymdyq ósim saqtalǵanymen, jedel járdem shaqyratyndar birtindep azaıyp keledi. Mektepter men balabaqshalarda balalardy kún saıyn tekserip, aýrý belgili barlardy oqshaýlaý sharalary júrgizilip jatyr. Bul týraly Almaty qoǵamdyq densaýlyq basqarmasy basshysynyń orynbasary Láıla Imanǵalıeva aıtty.
Onyń málimetinshe, aýrýshańdyq deńgeıi maýsymdyq shekten aspaıdy, mekemeler turaqty jumys istep tur, tósek-oryn men dáriger de jetkilikti.
Almatyda 69 eresek adam A/H3N2 tumaýyn juqtyrǵan.
– Barlyǵy emdelip jatyr, jaǵdaıy qanaǵattanarlyq, - dedi Láıla Imanǵalıeva Óńirlik kommýnıkatsııalar qyzmetinde ótken brıfıng kezinde.
Qalada sonymen qatar rınovırýs, bokavırýs, RS-vırýs, adenovırýs, paragrıpp pen maýsymdyq koronavırýs sııaqty basqa da vırýstar bar.
Imanǵalıevanyń sózinshe, júkti áıelder men balalarǵa kóp kóńil bólinedi. Dárigerler naýqastyń úıine baryp, olardy baqylap, qajet bolǵan jaǵdaıda aýrýhanaǵa jatqyzyp jatyr. Medıtsınalyq uıymdar kúsheıtilgen jumys rejımine kóshken.
– Balalarǵa Balalar qalalyq klınıkalyq ınfektsııalyq aýrýhanasy táýlik boıy kómek kórsetedi. Negizgi korpýs pen qalanyń aýdandaryna bólingen eki bólimshede jalpy 719 tósek bar. Eresekter men júkti áıelderge arnap S. Jekenova atyndaǵy qalalyq klınıkalyq ınfektsııalyq aýrýhana (400 tósek, onyń ishinde 9 reanımatsııalyq) men № 4 qalalyq perzenthana (70 tósek, onyń ishinde 6 reanımatsııalyq) jumys isteıdi: Infektsııalyq statsıonarlardyń júktemesi 58,2-61,8% deńgeıinde. Ahýal nasharlaı qalsa, oryn sanyn kóbeıtýge múmkindik beretin qosymsha 202 tósek qory da bar, - dedi ol.
Basqarma ókiliniń málimetinshe, qarashanyń basynda jedel járdem shaqyrǵandar kúrt kóbeıgenimen (táýligine 1 600-ge deıin), keıin birtindep báseńdeı bastady. 28 qarashadan bastap 103 nómirine qońyraý shalǵandar sany táýligine 700-1 000 aralyǵyna deıin azaıdy.
Al mektep pen balabaqshada kún saıyn tańerteń tekseris júrgiziledi: tárbıeshiler men dárigerler balalardy qarap, ata-anasymen sóılesip, aýyryp turǵandaryn ujymǵa jibermeı alyp qalady.
– Bilim beretin mekemelerde dáriger jaǵy jetkilikti, - dedi Láıla Imanǵalıeva.
Eske salaıyq, buǵan deıin Almatynyń sanıtarlyq qyzmeti Jańa jyl qarsańynda mektepter men balabaqshalarda jappaı is-sharalardy shekteýdi usynǵanyn jazǵanbyz. Buǵan JRVI men tumaýmen aýyrǵandar sanynyń ósýi sebep bolyp otyr.
Aıta keteıik, Almatynyń sanıtarlyq qyzmeti Jańa jyl qarsańynda mektepter men balabaqshalarda jappaı is-sharalardy shekteýdi usyndy.