JRVI-diń órshýi: Qazaqstanda 900 mektep qashyqtan oqytýǵa kóshti

ASTANA. KAZINFORM —JRVI men tumaý jaǵdaılarynyń kóbeıýine qatysty el boıynsha 250 myńǵa jýyq oqýshy qashyqtan oqyp jatyr. Bul týraly Densaýlyq saqtaý birinshi vıtse-mınıstri Tımýr Sultanǵazıev málim etti.

— Qashyqtan oqytýǵa eldiń 13 óńirinde 11 813 synyp kóshirildi. Jalpy, 903 mektepte qashyqtan bilim alýǵa 250 myńǵa jýyq bala aýysty. Bul rette, kesheden beri birshama dınamıka bar, — dedi T. Sultanǵazıev Senatta tilshiler suraǵyna jaýap bere otyryp.

Onyń aıtýynsha, JRVI men tumaýdyń asqynyp ketý qaýpi bar. Tumaý saldary pnevmonııaǵa aınalýy múmkin, ásirese 5 jasqa deıingi kishkentaı balalarǵa qaýipti.

— Sondyqtan ata-analar jaǵdaıdy únemi qadaǵalap, qajet bolǵan jaǵdaıda medıtsınalyq mamandardy shaqyrýy kerek, — dedi vıtse-mınıstr.

Budan buryn habarlanǵandaı, Qostanaıda barlyq mektep qashyqtan oqıtyn boldy.