JRVI boıynsha epıdemıologııalyq jaǵdaı turaqty — mınıstrlik
ASTANA. KAZINFORM – 23-29 qazan aralyǵynda elimizde jiti respıratorlyq vırýstyq ınfektsııalardyń 106 930 jaǵdaıy tirkelgen. Bul 108 513 jaǵdaı tirkelgen ótken epıdemıologııalyq maýsymnyń uqsas kezeńiniń kórsetkishinen 1,5%-ǵa tómen. Bul týraly Densaýlyq saqtaý mınıstrligi málim etti.
Epıdemıologııalyq maýsymnyń basynan bastap aǵymdaǵy jyldyń 1 qyrkúıeginen 29 qazanyna deıin JRVI-diń 1 128 140 jaǵdaıy tirkeldi, bul da bir jyl burynǵydan tómen (1,2 ese).
Naýqastardyń 66%-y 14 jasqa deıingi balalar-750 319 jaǵdaı.
Maýsym bastalǵannan beri A tıpti tumaýdyń (H3N2) 45 jaǵdaıy, onyń 23-i balalarda zerthanalyq rastaldy. Sondaı-aq, tumaýǵa qarsy emes vırýstarǵa 1456 zerthanalyq zertteýler júrgizildi, 30% jaǵdaıda oń nátıjeler alyndy. Kóbinese rınovırýs (60%), paratumaý (14,4%) jáne bokavırýs (10,5%) anyqtalady.
Elimizdiń statsıonarlarynda 7 222 ınfektsııalyq tósek ornalastyrylǵan, onyń 39%-y qazir jumys isteıdi. 2 793 patsıent, onyń ishinde JRVI-men 2 433 jáne pnevmonııamen 360-y emdeýge jatqyzyldy.
— Infektsııalyq bólimshelerdiń shamadan tys júktelýi baıqalmaıdy — barlyq óńirlerde syrqattanýshylyqtyń odan ári ósýi jaǵdaıynda tósekterdiń jetkilikti rezervi bar, — dep habarlady Densaýlyq saqtaý mınıstrligi.
Tumaýǵa qarsy vaktsınatsııalak sheńberinde halyqtyń osal toptary úshin vaktsınanyń 2,1 mln dozasy satyp alyndy, bul DDU usynǵan keminde 10% deńgeıinde halyqtyń 11%-yn qamtýǵa múmkindik beredi. 29 qazandaǵy jaǵdaı boıynsha 1 689 178 adam egildi, vaktsınatsııalaý jalǵasady.
Álemdegi epıdemıologııalyq jaǵdaı
DDU deregi boıynsha, Eýropada tumaý vırýstarynyń belsendiligi artyp keledi — alty elde aýrý deńgeıi bazalyq deńgeıden asyp ketti, Ispanııa men Norvegııada indet tirkeldi. Tumaýdyń 129 jaǵdaıynyń 98%-y A tıpti vırýsqa jatady.
AQSh-ta vırýstardyń belsendiligi tómen bolyp qalady, 38 aptada tumaýdyń 27 jaǵdaıy tirkeldi. Azııa elderinde (Katar, Sıngapýr) A (H1N1)pdm09, A (H3N2) jáne V tıpti tumaý vırýstarynyń jergilikti órshýi tirkelgen.
Qazaqstannyń Densaýlyq saqtaý mınıstrligi epıdemıologııalyq ahýalǵa monıtorıng júrgizýdi jalǵastyrýda jáne azamattardy tumaýǵa qarsy, ásirese qaýip toptarynyń ókilderin — balalar, qarttar men sozylmaly aýrýlary bar adamdardy ýaqtyly vaktsınatsııalaýǵa shaqyrady.
Aıta keteıik, Astanada maýsym basynan beri 27 myńnan astam JRVI jaǵdaıy tirkeldi.