Jozep Borrel Astanaǵa sapary týraly: Qazaqstandaǵy aýqymdy reformalar talqylandy
Aıta keteıik, búgin Aqordada EO-nyń Syrtqy ister jáne qaýipsizdik saıasaty jónindegi Joǵarǵy ókili J. Borrel men QR Premer-Mınıstriniń orynbasary–Syrtqy ister mınıstri Muhtar Tileýberdi baspasóz máslıhatyn ótkizdi.
«Jaqyn arada Qazaqstan men Eýropalyq Odaq arasyndaǵy dıplomatııalyq qarym-qatynas ornaýynyń 30 jyldyǵyn atap ótemiz. Aqpan aıynda biz osy aıtýly datany toılaımyz. Qazaqstan biz úshin óte mańyzdy seriktes bolyp sanalady. Biz yntymaqtastyqty damytýǵa múddelimiz. Sondyqtan Qazaqstan Prezıdenti Qasym-Jomart Toqaevqa myrzaǵa ózara senim negizinde ortaq syn-qaterlerge qalaı jaýap berý kerektigi jóninde keń aýqymdy pikirtalas júrgizgeni úshin alǵys aıtamyn. Biz qarym-qatynasymyzdy nyǵaıta bergimiz keledi. Kóp jyldar boıy ekonomıkalyq qarym-qatynas ornattyq jáne búginde Eýropalyq Odaq aımaqtaǵy eń iri ınvestor bolyp otyr», - dedi Jozep Borrel.
Sonymen qatar ol EO Qazaqstannyń eń iri saýda seriktesi ekenin aıta kele:
«Investıtsııa jáne saýda qarym-qatynastarynan bólek, basqa da salalarda yntymaqtastyqty nyǵaıtqymyz keledi. Biz dıplomatııalyq qatynas pen yntymaqtastyqty odan ári nyǵaıtýǵa daıynbyz», - dedi.
Eýropalyq Komıssııanyń vıtse-prezıdenti Astanaǵa sapary aıasynda Qazaqstandaǵy aýqymdy reformalar talqylanǵanyn aıtty.
«Aldaǵy saılaý – Qazaqstannyń osynaý aýqymdy reformanyń kún tártibin tolyq iske asyrýdy qamtamasyz etý úshin aıqyn erik-jigerin kórsetýdiń mańyzdy múmkindigi. Bul turǵyda Eýropalyq Odaqtyń qoldaý kórsetetinin atap ótkim keledi. Qazaqstanǵa jasaǵan osy saparym men úshin óte mańyzdy. Osy sapardan Ózbekstanǵa baramyn», - dedi Jozep Borrel.
Onyń aıtýynsha, Qazaqstan Prezıdentimen kezdesý barysynda Reseı men Ýkraına arasyndaǵy ahýal, Aýǵanstandaǵy jaǵdaı talqylandy.
Munymen qosa ol elderdiń aýmaqtyq tutastyǵy men egemendigi týraly BUU Jarǵysyn qurmetteýge qatysty pikir almasý bolǵanyn atap ótti.
«Osy oraıda Qazaqstannyń BUU Jarǵysyna, ıaǵnı barlyq elderdiń aýmaqtyq tutastyǵyna qatysty berik ustanymy úshin alǵys aıtamyn», - dedi J. Borrel.
Budan buryn habarlanǵandaı, búgin Memleket basshysy Qasym-Jomart Toqaev Aqordada J. Borreldi qabyldady.
Foto: akorda.kz
