Joze Moýrınıý «Realǵa» oralady: portýgalııalyq maman úsh jyldyq kelisimshartqa qol qoıdy
ASTANA. KAZINFORM – Portýgalııalyq bapker Joze Moýrınıý madrıdtik «Real Madrıd» klýbyna qaıta oralady. Ol ıspanııalyq klýbpen úsh jyldyq kelisimshartqa qol qoıyp, Madrıdtegi alǵashqy qyzmetinen keıin araǵa on jyldan astam ýaqyt salyp komandany qaıta tizgindemek, dep habarlaıdy BBC.
Resmı túrde «Real» Moýrınıýdi klýb prezıdentin saılaý is-sharasynan keıin tanystyrady. Saılaý 7 maýsymǵa belgilengen. 63 jastaǵy mamannyń kelisimsharty klýbtyń qazirgi prezıdenti Florentıno Peres jeńiske jetken jaǵdaıda ǵana kúshine enedi.
Aıta keteıik, Peres madrıdtik klýbty 2009 jyldan beri basqaryp keledi. Buǵan deıin ol bul qyzmetti 2000–2006 jyldary aralyǵynda atqarǵan. Qazir oǵan kásipker Enrıke Rıkelme qarsylas bolyp otyr. Degenmen sarapshylar saılaýdyń favorıti retinde dál Peresti ataıdy.
Moýrınıý ótken jyldyń qyrkúıeginen beri jattyqtyrǵan «Benfıka» klýbynan ketedi. Onyń jetekshiligimen komanda Portýgalııa chempıonatyn úshinshi orynda aıaqtady.
Moýrınıýdiń «Realdaǵy» alǵashqy kezeńi 2010–2013 jyldarǵa sáıkes keledi. Osy ýaqyt ishinde portýgalııalyq maman Ispanııa chempıonatyn, Ispanııa kýbogyn jáne eldiń Sýperkýbogyn jeńip aldy. Sol kezde madrıdtik klýb La Lıgada nátıjelilik boıynsha birneshe rekord ornatqan edi.
Endi Moýrınıý komandany Alvaro Arbeloanyń ornyna basqarady. Arbeloa ujym tizginin Habı Alonso ketkennen keıin qolǵa alǵan.
«Real» úshin 2025/26 jylǵy maýsym sátsiz ótti. Klýb birde-bir júlde jeńip ala almady, chempıondyqty «Barselonaǵa» berip qoıdy jáne kezekti El Klasıkoda katalonııalyq klýbtan 0:2 esebimen jeńildi. Al Chempıondar lıgasynda madrıdtik komanda shırek fınalda «Bavarııadan» eki match qorytyndysy boıynsha 4:6 esebimen utylyp, jarys jolynan shyqty.
«Realdan» 2013 jyly ketkennen keıin Joze Moýrınıý «Chelsı», «Manchester ıÝnaıted», «Tottenhem Hotspýr», «Roma» jáne «Fenerbahche» komandalarynda jumys istedi. «Romamen» birge ol 2022 jyly ÝEFA Konferentsııa lıgasyn jeńip aldy.
Buǵan deıin londondyq «Chelsı» klýbynyń jańa bas bapkeriniń esimi belgili bolǵan edi. Bul qyzmetke álem chempıony, 44 jastaǵy ıspanııalyq maman Habı Alonso taǵaıyndaldy. Ol jumysyn 1 shildede bastaıdy, al klýbpen jasalǵan kelisimi 2030 jyldyń ortasyna deıin eseptelgen.
