Joıqyn quıynnyń kesirinen Reseıde myńdaǵan turǵyn jaryqsyz qaldy
MÁSKEÝ. KAZINFORM — Sverdlov oblysynyń Kýshva qalasynda 22 maýsym kúni óńirge soqqan joıqyn quıynnyń saldary joıylyp jatyr. Qıraǵan nysandardyń vıdeosy áleýmettik jelilerde jarııalandy, dep habarlaıdy agenttik tilshisi reseılik BAQ-qa silteme jasap.
Kýshva qalasy tabıǵı apattyń dál ortasynda qalǵan. Qatty jel turǵyn úılerdiń shatyrlaryn ushyryp, kólikterdi zaqymdaǵan, kóptegen aǵashtardy tamyrymen julyp nemese syndyrǵan.
Sońǵy málimet boıynsha, shamamen 5 myń adam áli kúnge deıin elektr jaryǵynsyz otyr. 100-den astam turǵyn úı jóndeýdi qajet etedi. Zardap shekkender sany 16 adamǵa deıin ósken.
Quıyn Verhnıaıa Týra jáne Novaıa Lıalıa qalalarynyń bir bóligin de qamtyǵan. Jergilikti Telegram-arnalardyń habarlaýynsha, qolaısyz aýa raıy ondaǵan úı men avtokólikke zaqym keltirgen.
Tabıǵı apat saldarynan 4 myńnan astam úı jaryqsyz qalǵan. Shamamen 40 shatyr búlinip, 25 aǵash qulaǵan, sondaı-aq elektr berý jelileriniń toǵyz tiregi zaqymdanǵan.
Sonymen qatar tornadonyń Nıjnıı Tagıl qalasyna deıin jetkeni habarlanyp otyr.
Qazirgi ýaqytta mamandar búlingen ınfraqurylymdy qalpyna keltirý jumystaryn júrgizýde.
Reseılik BAQ-qa bergen suhbatynda sınoptık Konstantın Grıbanov Kýshvada baıqalǵandaı quıyndar klımattyń ózgerýine baılanysty Oral óńirinde jıileýi múmkin ekenin aıtty. Onyń sózinshe, jahandyq jylyný saldarynan mundaı tabıǵı qubylystar buryn sırek kezdesetin aýmaqtarda da paıda bolýy yqtımal.
Buǵan deıin Chelıabi oblysynda kýágerler Verhneýralsk qalasyna jaqyn mańda bolǵan qýatty tornadony vıdeoǵa túsirgen bolatyn. Bul óńirdegi alǵashqy jaǵdaı emes. Máselen, 2024 jyly quıyn elektr berý jelileriniń 10-nan astam tiregin qulatyp, birqatar eldi mekendi jaryqsyz qaldyrǵan.
Oqıǵaǵa baılanysty Máskeý fızıka-tehnıkalyq ınstıtýtynyń Qorshaǵan orta men ekologııany monıtorıngteý ǵylymı-tehnıkalyq ortalyǵynyń atqarýshy dırektory Aleksandr Rodın aldaǵy onjyldyqtarda ekstremaldy aýa raıy qubylystary jıileı túsýi múmkin ekenin málimdedi.
Onyń aıtýynsha, bolashaqta Máskeý qalasyna da kúshti daýyl kelýi yqtımal. Sarapshy mundaı úrdisti jahandyq klımattyq ózgeristermen qatar iri megapolısterdiń damý erekshelikterimen baılanystyrady.
