Joıylýǵa shaq qalǵan qaıaz ben pilmaı Aralǵa qaıta oraldy — balyqshy
QYZYLORDA. KAZINFORM — Balyqshy Qylyshbek Baıbosynov Aral aýdanyndaǵy Qamystybas balyq pıtomnıginde qyryq jylǵa jýyq ýaqyttan beri eńbek etip keledi. Búginde ol — munda toǵan brıgadıri.
Kásiporyn Aral aýdanynyń Qosjar eldi mekeninde ornalasqan, qyzmetindegi basty baǵyt — memlekettik tapsyrys sheńberinde Kishi Aral teńizin, Syrdarııa ózeni men Qamystybas kólin qundy balyq túrlerimen toltyrý.
Qosjardan bólek, Qaratereń aýyl okrýgine qarasty Tastaq eldi mekeninde bólimshesi bar.
Toǵan brıgadıriniń aıtýynsha, pıtomnık jumysshylary jylyna 50 mıllıonǵa jýyq shabaq, 12 mıllıondaı bir jazdyq jáne 420 myńdaı eki jazdyq qundy balyq túrlerin, onyń ishinde tuqy, dóńmańdaı, aq amýrdy ósirip, sý aıdyndaryna jiberedi.
— Ózim ósirgen sý marjandarynyń arasynan eń kirpııaz, názik balyq dep dóńmańdaıdy aıtar edim. Óıtkeni ol kóp kútimdi qajet etedi. Basqa balyqtarǵa qaraǵanda qatty ystyqqa tózimsiz. Balyq sharýashylyǵy — qıyndyǵy mol kásip, eshqandaı qatelesýge bolmaıdy. Sebebi seniń bir ǵana qateligiń mıllıondaǵan balyqtyń ómirine qaýip tóndirýi múmkin. Sondyqtan kún men túndi elemeı, bar ýaqytyńdy, nazaryńdy tek jumysqa aýdarýyńa týra keledi, — dedi Qylyshbek Baıbosynov.
Keıipkerimiz ár mezgildiń ózine tán ereksheligi baryn aıtty. Qysta toǵandardyń muzyn oıyp, balyqtardyń jaı-kúıin baqylasa, muzy tolyq erigesin sáýir aıynda tuqy, dóńmańdaı, aq amýr balyqtaryn bólip, jaıylym toǵandarǵa jiberedi.
— Negizgi jumys osydan keıin, ıaǵnı mamyr aıynda bastalady. Balyqtardyń atalyǵy men analyǵyna zaýyttyq ádispen ınektsııa jasap, ýyldyryq alýǵa kirisemiz. Ýyldyryqty jasandy jolmen shyǵaramyz. Bul protses mamyr-maýsym aılarynda júredi. Osy aralyqta 50 mıllıonǵa jýyq qurtshabaq paıda bolady, — dedi kásiporyn ókili.
Qamystybas balyq pıtomnıgi eki jyl buryn Qazaqstannyń qyzyl kitabyna engen, joıylýǵa shaq qalǵan Aral qaıazyn jınap, ósirýge den qoıdy.
— Sonymen qatar Qazaqstannyń qyzyl kitabynda kezdesetin, Aral teńizinde joıylyp ketken bekire tuqymdas Aral pilmaıy ákelindi. Keleshekte odan ónim alyp, qoryn arttyrý úshin taǵy da kóptep ákelýdi jón kórip otyrmyz, — dedi Qylyshbek Baıbosynov.
Balyqshy Kishi Aral teńiziniń tolýy ıhtıofaýnanyń damýyna septigin tıgizetinine senimdi. Sebebi sý kelse, balyq ta, balyqtyń qoregi de kóbeıedi dep esepteıdi.
Aıta keteıik, búginde Qazaqstanda óndiriletin 50-den astam ataýly balyq ónimi álemniń 21 eline eksporttalady.