Joıylyp bara jatqan jabaıy mysyqtardy Anglııaǵa qaıtarý qarastyrylyp jatyr

ASTANA.KAZINFORM — Brıtandyq tabıǵatty qorǵaýshylar Devondaǵy 50 jabaıy mysyqty tabıǵatqa jiberip, sol arqyly joıylyp ketý qaýpi tóngen janýarlardy tabıǵı ortasyna qaıtaramyz dep úmittenedi. Bul týraly VVS agenttigi jazdy.

Alaıda jabaıy tabıǵattyń tepe-teńdigin buzý jáne jabaıy mysyqtar popýlıatsııasyn úı mysyqtarymen aralastyrý qaýipi bar.

South West Wildcat Project (Devon, Anglııa) zertteýshileri bul mysyqtar okrýgte jaqsy ósedi degen qorytyndyǵa keldi. Olar 2028 jyly alǵashqy mysyqtardy tabıǵatqa jiberemiz dep josparlap otyr.

South West Wildcat jobasy Ekseter ýnıversıtetimen birlese otyryp, Devon turǵyndary arasynda saýalnama júrgizip, halyqtyń 80% jabaıy mysyqtardy reıntrodýktsııalaýdy qoldaıtynyn anyqtady.

Biraq keıbir jergilikti turǵyndar bul janýarlardyń kelýi Devonnyń qalyptasqan tabıǵı ortasyn ózgertedi dep qaýiptenedi.

— Jabaıy mysyqtar dala tyshqandaryn jeıdi deıdi. Biraq dala tyshqandary meniń úkilerimniń tamaǵy, sondyqtan tyshqandar sany azaısa, úkiler zardap shegedi, — dep qorqady fermer Olıver Edvards.

Onyń aıtýynsha, jyrtqyshtardyń kelýi munda burynnan mekendegen ań men qusqa zııanyn tıgizedi.

Edvards tabıǵatty qorǵaýshylar jabaıy mysyqtardy tabıǵatqa jibermes buryn jergilikti fermerlermen jáne jer ıelerimen keńesý kerek dep sanaıdy.

Jaýap retinde South West Wildcat jobasynyń ókili Ket Djeffs onyń qyzmetkerleri jergilikti turǵyndardyń kez kelgen alańdaýshylyǵyn joıýǵa tyrysady dep ýáde berdi. Ol sondaı-aq jabaıy mysyqtardyń qaıda jiberiletini áli anyqtalmaǵanyn atap ótti. Sondaı-aq olardyń popýlıatsııasy qarqyndy óspeıtinin aıtty. Óıtkeni bul janýarlardyń sany az, ári olar úlken aýmaqta mekendeıtin bolady.

Onyń aıtýynsha, fermerler taýyqtary men úı janýarlaryn túlki sııaqty jyrtqyshtardan qorǵaýdy úırengeni sekildi osy jabaıy mysyqtardan da qorǵaıtyn bolady.

Eske salaıyq, buǵan deıin Ulybrıtanııa bıligi zańdy mıgranttarǵa qatysty erejelerdi qatańdatatyny týraly jazdyq.